काठमाडौं । राष्ट्रिय स्वतन्त्र पार्टीकी सांसद टीका संग्रौलाले मलेसियामा सडक दुर्घटनामा परी मृत्यु भएका अछामका दीपक बोहराको शव यथाशीघ्र नेपाल ल्याउन सरकारसँग माग गरेकी छन्।

प्रतिनिधिसभाको बैठकमा बोल्दै सांसद संग्रौलाले अछामको मेल्लेख गाउँपालिका–६, सोडसा कालापातालका बोहरा केही समयअघि रोजगारीका लागि मलेसिया गएको जानकारी दिइन्।

उनका अनुसार करिब एक साताअघि मलेसियामा भएको सडक दुर्घटनामा गम्भीर घाइते भएका बोहराको उपचारका क्रममा सोमबार बिहान मृत्यु भएको हो।

सांसद संग्रौलाले मृतकका आमाबुबा छोराको शव नेपाल ल्याइदिने प्रतीक्षामा रहेको बताउँदै अन्तिम संस्कारका लागि भए पनि शव तत्काल नेपाल ल्याउने व्यवस्था गर्न सरकारसँग आग्रह गरिन्।

‘मृतकका आमाबुबा छोराको शव नेपाल ल्याइदिने प्रतीक्षामा छन् । परिवारले अन्तिम संस्कारका लागि भए पनि शव नेपाल ल्याइदिन आग्रह गरिरहेका छन्,’ उनले भनिन्।

बोहरा कार्यरत कम्पनीले शव नेपालसम्म ल्याउने प्रतिबद्धता जनाएको भए पनि प्रक्रिया छिटो सम्पन्न गर्न परराष्ट्र मन्त्रालय, मलेसियास्थित नेपाली दूतावास तथा सम्बन्धित निकायबीच आवश्यक समन्वय हुनुपर्ने संग्रौलाको भनाइ छ।

उनले सभामुखमार्फत नेपाल सरकारलाई मृतक बोहराको शव यथाशीघ्र नेपाल ल्याई परिवारलाई हस्तान्तरण गर्ने व्यवस्था मिलाउन आग्रह गरिन्।