नेपाल प्रिमियर लिग (एनपीएल) अन्तर्गत आइतबारको पहिलो खेलमा कर्णाली याक्सले चितवन राइनोजलाई १५४ रनको लक्ष्य दिएको छ। कीर्तिपुरस्थित त्रिवि क्रिकेट मैदानमा टस जितेर पहिले ब्याटिङ गरेको कर्णालीले निर्धारित २० ओभरमा ८ विकेट गुमाएर १५३ रन बनाएको हो।

कर्णालीका लागि हुसेन तलतले सर्वाधिक ५१ रन बनाए। उनले ३३ बलमा तीन छक्का र दुई चौका प्रहार गर्दै अविजित अर्धशतकीय पारी खेले।

त्यस्तै, आरिफुल इस्लामले आक्रामक ब्याटिङ गर्दै १५ बलमा चार चौका र दुई छक्काको मद्दतमा ३५ रन जोडे। गुल्सन झाले ६ बलमा दुई छक्का र एक चौकासहित १८ रन बनाए।

कर्णालीका कप्तान डेभिड मिलर ५ रनमा आउट हुँदा दीपक डुम्रेले ७, सोमपाल कामीले ४ र मार्क वाटले ६ रन बनाए। सचिन शर्मा भने खाता नखोली पेभेलियन फर्किए।

चितवनका लागि कमलसिंह ऐरी, सलाहुद्दीन खान र उसामा मीरले समान दुई-दुई विकेट लिए। रिजन ढकाल र सिकन्दर राजाले एक-एक विकेट हात पारे।

अब चितवनले जितका लागि १५४ रनको लक्ष्य पछ्याउँदै जवाफी ब्याटिङ गर्नेछ। चितवन राइनोज यसअघि नै प्लेअफमा प्रवेश गरिसकेको छ भने कर्णाली याक्स प्रतियोगिताबाट बाहिरिसकेको छ।