जर्मनीको सशस्त्र बल बुन्डेसवेरमा कार्यरत महिला सैनिकमध्ये ३८ प्रतिशतले मौखिक यौन दुर्व्यवहार भोगेको खुलासा भएको छ। रक्षामन्त्री बोरिस पिस्टोरियसले बुधबार सार्वजनिक गरेको सर्वेक्षणले सेनाभित्र यौन दुर्व्यवहारको समस्या रहेको देखाएको हो।

सर्वेक्षणअनुसार १० प्रतिशत महिला सैनिकले शारीरिक यौन दुर्व्यवहारको सामना गर्नुपरेको बताएका छन्। विशेषगरी कम उमेरका र तल्लो दर्जामा कार्यरत महिला सैनिक बढी प्रभावित रहेको पाइएको छ।

अध्ययनमा सहभागी कुल सैनिकमध्ये दुई प्रतिशतले आफू यौन हिंसाको सिकार भएको बताएका छन्। यसका लागि आठ हजार महिला तथा पुरुष सैनिकसँग प्रश्नावली भराइएको थियो।

रक्षामन्त्री पिस्टोरियसले सेनामा यौन दुर्व्यवहारप्रति शून्य सहनशीलताको नीति रहेको बताउँदै पीडितलाई सहयोग, रोकथाम तथा अनुसन्धान र अनुशासनात्मक कारबाहीलाई थप प्रभावकारी बनाउने योजना सार्वजनिक गरेका छन्।

यसैबीच, ग्रिन्स पार्टीकी सांसद सारा नान्नीले यस्ता घटनाको उजुरी र अनुसन्धानका लागि स्वतन्त्र बाह्य निकाय गठन गर्न माग गरेकी छन्।

हाल बुन्डेसवेरमा महिला सैनिकको सहभागिता करिब १४ प्रतिशत छ। जर्मनीले सन् २०३५ सम्ममा सक्रिय र जगेडा गरी कुल चार लाख ६० हजार सैनिक पुर्‍याउने लक्ष्य राखेको छ।