नेपाली कांग्रेस सुदूरपश्चिम प्रदेश संसदीय दलले मुख्यमन्त्री खगराज भट्टसहित मन्त्रीहरूलाई नैतिकताका आधारमा राजीनामा दिएर सरकारबाट बाहिरिन आग्रह गरेको छ। बजेटजस्तो संवेदनशील विषयमा सरकारले गैरजिम्मेवार भूमिका खेलेको कांग्रेसको निष्कर्ष छ।

सोमबार पूर्वमुख्यमन्त्री तथा कांग्रेस संसदीय दलका नेता कमलबहादुर शाहको अध्यक्षतामा बसेको बैठकले असोज २५ गते प्रस्तुत आर्थिक वर्ष २०८३/८४ को बजेटबारे सरकारको कार्यशैलीप्रति असन्तुष्टि जनाएको हो।

कांग्रेसका अनुसार बजेट सदनमा प्रस्तुत भइसकेपछि त्यसबारे छलफल नगरी मन्त्रिपरिषद्ले सर्तसहित बजेट सच्याउने निर्णय गर्नु गलत हो। सरकारले आफ्नै सांसद र प्रदेशसभालाई समेत गुमराहमा पारेको कांग्रेसको आरोप छ।

बैठकले सभामुख भीमबहादुर भण्डारीको भूमिकामाथि पनि प्रश्न उठाएको छ। प्रतिपक्षी सांसद अनुपस्थित रहेको अवस्थामा सदन सञ्चालन गरेको, विपक्षीसँग छलफल नगरी संसदीय समिति गठन गरेको तथा बजेट पारित गर्ने प्रक्रियामा संसदीय मर्यादा उल्लङ्घन गरेको कांग्रेसको आरोप छ।

साउन २९ गते नेकपाका नेता भट्ट एमालेको समर्थनमा मुख्यमन्त्री नियुक्त भएका थिए। उनको सरकारले यसअघिको कमलबहादुर शाह नेतृत्वको सरकारले ल्याएको बजेटको सट्टा नयाँ बजेट ल्याएको थियो।