नेपालका लागि अमेरिकी राजदूत र्‍यान्डी बेरीले आफूहरुले नेपाललाई कहिले पनि प्रो-अमेरिकन हुन र कुनै पनि अमेरिकी एलाइन्समा सहभागी हुन आग्रह नगरेको बताएका छन् ।

नेपाली सेनाको कमाण्ड र स्टाफ कलेजमा अधिकृतहरुलाई सम्बोधन गर्दै उनले बरु आफूहरुले नेपाललाई जहिले पनि प्रो-नेपाली हुन आग्रह गरेको बताए । उनले भने, ‘हामीले नेपाललाई जहिले पनि प्रो-नेपाली हुन र आफ्नो सार्वभौमसत्ता र स्वायत्तताको रक्षाको प्रत्याभूति गर्न भनिरहेका छौं ।’

अमेरिकी राजदूतले आफूहरुको सहयोगको उद्देश्य नेपाललाई अझ प्रो-नेपाल बनाउन सहयोग गर्नु, आफ्नो खुट्टामा वलियोसँग उभिन सक्ने बनाउनु र अन्य कुनै पनि मुलुक (अमेरिकासहित) प्रति निर्भर नहुने बनाउनु रहेको बताए । अमेरिकाले नेपाललाई इन्डोप्यासेफिक रणनीतिमा सहभागी हुन आग्रह गरिरहेको चर्चा चलिरहेको बेला अमेरिकी राजदूतको सो प्रतिक्रिया आएको हो । उनले आफूले त्यो भन्नुको कारण हल्लाहरु र एकदमै संकुचित सोचाइ खतरनाक हुने बताए ।

अमेरिकी राजदूतले पछिल्लो समयमा विभिन्न भ्रामक सूचनाहरु फैलिएको बताउँदै नेपालसँग आफूहरुले सैन्य एलायन्स नखोजेको र त्यो नचाहेको बताए । उनले भने, ‘जतिबेला शित युद्ध उत्कर्षमा थियो, त्यतिबेला पनि हामीले नेपालले हामीसँग सैन्य एलायन्समा जोडिन आग्रह गरेनौं ।’

त्यसैगरी उनले नेपालमा आफूहरुले सैन्य बेस राख्न नचाहेको र नखोजेको समेत बताए । उनले अगाडि भने, ‘नेपालले सैन्य बेस राख्न आग्रह गरे पनि हामीले नरम भाषामा भन्ने छौं- हुँदैन, धन्यवाद ।’ उनले अगाडि भने, ‘बेला-बेलामा भन्ने गरिन्छ कि नेपाल दुई ढुंगा विचको तरुल हो, यदि त्यो सही हो भने नेपालले एकदमै होसियारीपूर्वक, राम्रो छलफल गरेर र कसरी राम्रोसँग आफ्नो सार्वभौमसत्ता बचाउने भन्नेमा केन्दि्रत भएर रणनीतिक कोर्स तय गर्नुपर्छ, ।’

सो सम्बोधनमा राजदूत बेरीले मिलेनियम च्यालेन्ज कर्पाेरेसन (एमसीसी) को बारेमा पनि प्रतिक्रिया दिएका छन् । राजदूत बेरीले एमसीसी जस्तो विकास परियोजनाको विषयमा पनि केही मानिसले सैन्य गठबन्धनसँग जोडेको भन्दै अमेरिकी कानुनले एमसीसी फन्डिङलाई सैन्य गतिविधिको लागि प्रयोग गर्न पूर्णरुपमा बर्जित गरेको बताए ।

उनले यस सम्बन्ध सत्यतथ्य र सूचनाहरु सार्वजनिक रुपमा नै उपलब्ध भएको समेत उल्लेख गरे । यस्ता भनाइ र अभिव्यक्ति कारण नेपालले पाउन लागेको आर्थिक अनुदान कार्यक्रम गुम्न सक्ने खतरा समेत औंल्याए ।

सो कार्यक्रमलाई सम्बोधन गदै राजदूत बेरीले नयाँ अमेरिकी प्रशासनका प्राथमिकताहरुबारे समेत जानकारी गराएका थिए । उनले अमेरिकाको विदेश नीति प्रजातन्त्र, मानव अधिकार र समानतामा केन्दि्रत रहेको बताए । उनले अगाडि भने, ‘एक प्रजातान्त्रिक, सार्वभौम, समावेशी र कानुनी शासन अपनाउने नेपाल भएमा मात्र हाम्रो राष्ट्रिय सुरक्षा चासो सम्बोधन हुन्छ ।’

विश्व शान्ति स्थापना र अन्य मानवीय सहयोगमा नेपाली सेनाले खेलेको भूमिकाको प्रशंसा गर्दै राजदूत बेरीले नेशनल डिफेन्स विश्वविद्यालय स्थापनाको लागि अमेरिका सहयोग गर्न तयार रहेको बताए ।

अमेरिकी राजदूतले ७० वर्षदेखि नेपाललाई विकासको क्षेत्रमा सहयोग गरेको बताउँदै भने, ‘हामी नेपाल अमेरिकाप्रति र अन्य कुनै पनि मुलुकप्रति निर्भर होस् भन्ने चाहँदैनौं । त्यसैको लागि हामीले अमेरिकालाई ७३ वर्षदेखि विकासमा सहयोग गरिरहेका छौं ।’