सडकमा सुतेर प्रतिनिधिसभा विघटनको विरोध
(काठमाडौं)भर्खरै थुनुवा कक्षबाट निकालिएका एक युवक मैलो भोटो र धोती लगायर उभिएका छन् । हातमा बन्दुक बोकेका पहरेदारले उनलाई पहरा दिइरहेका छन् । नजिकै रहेको खरीको रुखमा मोटो डोरी झुण्डिरहेको छ।
डोरीको मुखैमा सुर्के गाँठो कसेर कोही मानिसलाई मृत्युदण्ड दिने तयारी भइरहेको जस्तो देखिन्छ । टेकु पचलीमा रहेको यो रुख त्यही रुख हो जहा वि. सं. १९९७ सालमा सहिद शुक्रराज शास्त्रीलाई मृत्युदण्ड दिइएको थियो ।
झट्ट हेर्दा केही डरलाग्दो दृष्य । बाटामा हिड्नेहरु पनि टक्क रोकिएर हेरिरहेका थिए । बृहत नागरिक आन्दोलन समूहले शुक्रबार टेकु पचलीमा विरोध स्वरुप कलात्मक प्रस्तुति दिएको हो ।
शिल्पी थिएटरको प्रस्तुतिमा रंगकर्मीले सहिद शुक्रराज शास्त्रीको जीवनी र मृत्युवरणलाई नाटक मार्फत देखाएका हुन् । शुक्रराजको भूमिकामा थिए कलाकार युवराज घिमिरे । उनलाई सहयोग गरेका थिए पवित्रा खड्का, रविन्द्र खड्का, रविन परियार, गोविन्द ओली, रवि श्रेष्ठ लगायतको समूहले ।
‘प्रतिगमन विरुद्धको प्रतिरोध’ कार्यक्रममा कलाकारले सडकमै नाटक प्रदर्शन गरेका हुन् । संसद पुनस्र्थापना हुनुपर्ने भन्दै नागरिक अगुवाले सडकमै सुतेरसमेत प्रदर्शन गरेका छन् ।
प्रधानमन्त्री केपी ओलीले पुस ५ गते प्रतिनिधिसभा विघटन गरेर प्रतिगमन सुरु गरेको भन्दै निरन्तर आन्दोलनमा उत्रिएको नागरिक समूहले शुक्रबार फरक ढंगले विरोध प्रदर्शन गरेको हो । mसहिद दिवसको अवसर पारेर आयोजना गरिएको कार्यक्रममा सहभागीले सडकमै सुतेर विरोध गरे । विरोधमा सहभागी सबै सडकमै लम्पसार परेका थिए ।
‘डाइ इन प्रोसेस’ नामक दिइएको सांकेतिक विरोधको शैली पछ्याउदै सहभागी युवा सडकमै लम्पसार परेर सुतेका हुन् । प्रतिनिधिसभा विघटनको विरोधमा नागरिक आन्दोलनमा केही दिनअघि पानीको फोहोरो प्रहार भएको थियो । शुक्रबारको आन्दोलनमा भने सुरक्षाकर्मीले कुनै हस्तक्षेप गरेनन् ।
