कोलम्बियाको दक्षिणपश्चिमी नारिनो प्रान्तमा अनुमति नलिई सञ्चालन गरिएको खुला सुनखानी भत्किँदा कम्तीमा १४ जना खानी मजदुरको मृत्यु भएको छ भने सात जना घाइते भएका छन्। क्षेत्रीय अधिकारीहरूका अनुसार सोमबार राति खोजी तथा उद्धार कार्य सम्पन्न भएको छ।

नारिनो प्रान्तीय सरकारका अनुसार सान्ता बार्बरा डे इस्कुआन्डे सहरनजिकै खानी भत्किएको हो। घटनाले अनौपचारिक रूपमा सञ्चालन भइरहेका खानीमा काम गर्ने मजदुरले सामना गर्नुपरेको जोखिमलाई पुनः उजागर गरेको छ।

सरकारले तीन महिनाभन्दा कम अवधिमा प्रान्तमा दोस्रोपटक खानी भत्किएको जनाएको छ। यी दुई दुर्घटनामा गरी २७ जनाको मृत्यु भएको उल्लेख गरिएको छ।

घना वर्षावनले घेरिएको सान्ता बार्बरा डे इस्कुआन्डे पुग्न डुङ्गा वा साना विमानको सहारा लिनुपर्छ। दुर्गम भौगोलिक अवस्थाका कारण उद्धार तथा सहायता टोलीलाई घटनास्थलसम्म पुग्न कठिन भएको थियो।

नारिनोका गभर्नर लुइस अल्फोन्सो एस्कोबारले दुर्घटनाप्रति दुःख व्यक्त गर्दै यस घटनाबाट धेरै परिवार प्रभावित भएको बताएका छन्।

कोलम्बियामा सरकारी अनुमति नलिई सञ्चालन गरिएका सयौँ साना खानी छन्। तीमध्ये केही खानी सशस्त्र विद्रोही समूहको नियन्त्रणमा रहेको बताइएको छ। उक्त क्षेत्रमा सन् २०१६ को शान्ति सम्झौतामा सहभागी हुन अस्वीकार गरेका फार्कका पूर्वसदस्यको नेतृत्वमा रहेको ज्याकोबो एरेनास समूहसहित दुई विद्रोही समूह सक्रिय छन्।

यसैबीच, कोलम्बियाको लोकपाल कार्यालयले प्रभावित क्षेत्रमा मानवीय सहायता पुर्‍याउन अवरोध नगर्न सशस्त्र समूहहरूलाई आग्रह गरेको छ। कार्यालयले सामाजिक सञ्जाल एक्समार्फत अहिलेका सबै प्रयास जीवन बचाउन र आपत्कालीन अवस्थाको सामना गर्न केन्द्रित हुनुपर्ने जनाएको छ।