काठमाडौं । चर्चित भारतीय अभिनेता नाना पाटेकरको ७५ वर्षको उमेरमा निधन भएको छ। बिहीबार बिहान गोवाको डोना पाउलास्थित निवासमा बेहोस अवस्थामा भेटिएका उनलाई तत्काल अस्पताल लगिए पनि चिकित्सकले मृत घोषणा गरेका थिए। अस्पतालका अनुसार उनलाई गम्भीर हृदयाघात भएको थियो र करिब ४५ मिनेटसम्म सीपीआर दिइए पनि बचाउन सकिएन।

पाटेकरका छोरा मल्हार पाटेकरले पनि उनको निधनको पुष्टि गरेका छन्। सन् १९७८ मा ‘गमन’बाट फिल्मी यात्रा सुरु गरेका पाटेकरले हिन्दी तथा मराठी चलचित्रमा चार दशकभन्दा लामो समय अभिनय गरेका थिए। ‘परिन्दा’, ‘क्रान्तिवीर’, ‘अग्निसाक्षी’, ‘अब तक छप्पन’, ‘वेलकम’ लगायत उनका चर्चित चलचित्र हुन्। 

अभिनय क्षेत्रमा योगदानका लागि पाटेकरले तीन राष्ट्रिय चलचित्र पुरस्कारसहित विभिन्न सम्मान प्राप्त गरेका थिए। भारत सरकारले उनलाई सन् २०१३ मा पद्मश्रीबाट सम्मान गरेको थियो। 

उनको पछिल्लो फिल्मी काममा ‘ओ’रोमियो’ र ‘सुबेदार’ रहेका थिए। उनको निधनसँगै भारतीय चलचित्र क्षेत्रमा लामो समयदेखि प्रभावशाली योगदान दिँदै आएका एक चर्चित कलाकारको अभिनय यात्रा समाप्त भएको छ।