मुग्लिन–नारायणगढ सडकखण्डअन्तर्गत १५ किलो नजिकै माथिबाट लेदो खसेपछि शुक्रबार बिहानदेखि सवारी आवागमन प्रभावित भएको छ। सडकमा ठूलो मात्रामा लेदो खसेपछि केही समय दुवैतर्फका सवारी साधन रोकिएका थिए।

सडक डिभिजन कार्यालय भरतपुरका अनुसार अहिले लेदो पन्छाउने काम भइरहेको छ। लेदो हटाउने कार्य जारी रहेकाले हाल सडक एकतर्फी रूपमा सञ्चालनमा ल्याइएको छ। सडक डिभिजनले करिब डेढ घण्टाभित्र लेदो पूर्ण रूपमा हटाएर सडकलाई दुईतर्फी सञ्चालनमा ल्याउने अनुमान गरेको छ।

लेदो खसेपछि गन्तव्यतर्फ हिँडेका सवारी साधन सडकखण्डमै रोकिएका छन्। सडकमा लेदो तथा पहिरोको जोखिम रहेकाले यात्रा गर्दा सावधानी अपनाउन र धैर्य गर्न प्रहरीले यात्रुलाई आग्रह गरेको छ।

वर्षायाममा मुग्लिन–नारायणगढ सडकखण्डमा पटक–पटक पहिरो तथा लेदो खस्ने गरेका कारण यस क्षेत्रमा यातायात प्रभावित हुँदै आएको छ। पछिल्लो घटनापछि पनि सडक सञ्चालनलाई सहज बनाउन सुरक्षाकर्मी तथा सडक डिभिजनको टोलीले लेदो हटाउने काम गरिरहेको छ।