प्रहरीले वैदेशिक रोजगारीमा आकर्षक तलबको प्रलोभनमा पारी विभिन्न देशहरू पठाइदिने भन्दै रकम ठगी गरेको अभियोगमा पाँच जनालाई पक्राउ गरेको छ।

पक्राउ पर्नेहरूमा झापा घर भई हाल काठमाडौँ बुढानीलकण्ठ नगरपालिका-१० बस्ने २९ वर्षीया सुष्मा भण्डारी, सिन्धुली घर भई हाल काठमाडौँ कागेश्वरी मनोहरा नगरइपालिका-९ बस्ने २८ वर्षीया करिना देवकोटा, झापा घर भई काठमाडौँ महानगरपालिका-३ बस्ने २७ वर्षीय साजन खनाल, दोलखा घर भइ भक्तपुर सूर्यविनायक नगरपालिका-१ बस्ने ३४ वर्षीय पेमा लामा तथा ओखलढुंगा घर भई काठमाडौँ महानगरपालिका-१५ बस्ने २७ वर्षीया तोमकुमारी थापा रहेका काठमाडौँ उपत्यका अपराध अनुसन्धान कार्यालयले जनाएको छ।

पक्राउ परेकामध्ये सुष्माले चेक रिपब्लिक पठाइदिने भन्दै ५ लाख ३५ हजार, करिनाले लिथुआनिया पठाइदिने भन्दै २ लाख ५० हजार, साजनले फिनल्याण्ड पठाइदिने भन्दै १२ लाख, पेमाले रोमानिया पठाइदिने भन्दै एक लाख र तोमकुमारीले माल्टा पठाइदिने भन्दै एक लाख ३५ हजार लिई सम्पर्कविहीन भएको भन्ने उजुरीको आधारमा पक्राउ गरिएको प्रवक्ता एवं प्रहरी उपरीक्षक रामेश्वर कार्कीले जानकारी दिए।

प्रहरीले सुष्मालाई काठमाडौँ बुढानिलकण्ठ नगरपालिका-१०, करिना र साजनलाई काठमाडौँ महानगरपालिका–३ तथा पेमालाई काठमाडौँ महानगरपालिका-१२ र तोमकुमारीलाई काठमाडौँ महानगरपालिका-१५ बाट पक्राउ गरिएको जनाएको छ।

उनीहरूलाई मंगलबार आवश्यक अनुसन्धान तथा कारबाहीको लागि वैदेशिक रोजगार विभाग ताहाचल काठमाडौँ पठाइएको प्रवक्ता कार्कीले बताए।