प्रहरीले बरामद गरेको भारतबाट भन्सार छलेर ल्याइएका करिब ४७ लाख २८ हजार ६६६ रुपैयाँ बराबरका सामानसहितको ट्रक भन्सार बुझाएको जिल्ला प्रहरी कार्यालय रौतहटले मंगलवार सार्वजनिक गरेको छ । 

जिल्ला प्रहरी कार्यालय रौतहटको गस्ती टोलीले आइतवार राति साढे ११ बजे बौधीमाई नगरपालिका–५ स्थित हनुमान मन्दिर नजिक चेकजाँच गर्ने क्रममा ना ६ ख ५६२ नम्बरको ट्रक नियन्त्रणमा लिएको थियो । 

ट्रक चालक धादिङको गल्छी–६ का ३० वर्षीय विनय लामालाई समेत प्रहरीले नियन्त्रणमा लिएको जिल्ला प्रहरी प्रवक्ता डीएसपी राजु कार्कीले जानकारी दिए । 

ट्रकसहित बरामद गरिएका सामानमा जुट ३ बोरा, गुल १ बोरा, सेन्ट २ कार्टुन, पान मसला मिक्स ६ बोरा, युरिया मल ३ बोरा, पाकेट सुर्ती १ बोरा, खुल्ला सुर्ती ३ बोरा, चूनौटी ४ बोरा, हुक्का ३ बोरा, बिडी १ बोरा, कुकिन ५ बोरा, पान मसला जार ३ थान तथा केही मात्रामा पटाखा लगायतका वस्तुहरू रहेका छन् ।

प्रहरीका अनुसार बरामद गरिएको ट्रक, चालक र सामानलाई आवश्यक कारबाहीका लागि सोमबार राति जिल्ला भन्सार कार्यालय गौरमा बुझाइएको छ।