काठमाडौं । नेपालमा स्थानीय वायु-पश्चिमी वायुसँगै भारतको पश्चिम उत्तर-प्रदेशदेखि पूर्वीबंगलादेशसम्म फैलिएको न्यून चापीय क्षेत्रको आंशिक प्रभाव परेको छ।

बिहीबार बिहान देशभर आंशिकदेखि साधारणतया बदली रहेको हो। कोशी, बागमती प्रदेश र बाँकी प्रदेशका केही स्थानमा मेघगर्जन/चट्यांगसहित हल्कादेखि मध्यम वर्षा भइरहेको मौसम पूर्वानुमान महाशाखाले जनाएको छ ।

बिहीबार दिउँसो भने देशको पहाडी भू-भागमा आंशिकदेखि साधारणतया बदली हुने भएको हो । त्यस्तै, बाँकी भू-भागमा भने आंशिक बदलीदेखि मौसम मुख्यतया सफा हुने भएको छ। कोशी, मधेश, बागमती, गण्डकी प्रदेश र बाँकी भू-भागका केही स्थानमा मेघगर्जन/चट्यांगसहित हल्कादेखि मध्यम वर्षाको सम्भावना रहेको हो।

त्यस्तै, सुदूरपश्चिम, कर्णाली, लुम्बिनी र कोशी प्रदेशका केही स्थानमा हावाहुरीको पनि सम्भावना रहेको छ । देशका उच्च पहाडी/हिमाली भू-भागका केही स्थानमा हल्का हिमपातको समेत सम्भावना रहेको महाशाखाले जनाएको हो ।

बिहीबार राति भने कोशी, बागमती र गण्डकी  प्रदेश लगायत देशका पहाडी भू-भागमा आंशिकदेखि साधारणतया बदली हुने भएको छ । त्यस्तै, बाँकी भू-भागमा भने आंशिक बदलीदेखि मौसम मुख्यतया सफा हुने भएको हो ।

कोशी,बागमती, गण्डकी प्रदेश र बाँकी प्रदेशका केहही स्थानहरुमा मेघगर्जन/चट्यांगसहित हल्कादेखि मध्यम वर्षाको समेत सम्भावना रहेको महाशाखाले जनाएको छ।