ओली पक्षमा लागेका पूर्व माओवादी खेमाका नेता एवं उद्योग मन्त्री लेखराज भट्टले अध्यक्ष पुष्पकमल दाहाल 'प्रचण्ड' लाई दृष्टिविहीन र चिन्तनबिहीन नेताको आरोप लगाएका छन्।

सुदूरपश्चिम प्रदेशका ओली पक्षीय नेता-कार्यकर्तालाई बबरमहलस्थित एक पार्टी प्यालेसमा बुधवार सम्बोधन गर्दै मन्त्री भट्टले प्रचण्डले राति सुत्दा पनि प्रधानमन्त्री पद देख्ने गरेको आरोप लगाए ।

'राति सुत्दा पनि प्रधानमन्त्री देख्नुहुन्छ प्रचण्डजी। प्रधानमन्त्री अहिल्यै चाहियो भन्ने उहाँको माग छ।' उनले पूर्व माओवादीहरू एक हुनुपर्छ भन्ने तर्कको समेत खण्डन गरे ।

'प्रचण्डले घाइतेहरूलाई सम्झेनन्, शहीदलाई सम्झेनन्, बेपत्तालाई सम्झेनन्, अहिले पूर्व माओवादी एक हुनुपर्छ भनिरहेका छन्, त्यसो भए माधवकुमार नेपाललाई यहाँ पठाइदिनुस् न त,' उनले भने।