नेपालीहरूको दोस्रो ठूलो पर्व तिहार अर्थात् यमपञ्चक आजदेखि सुरु भएको छ। तिहारको पहिलो दिन आज काग तिहार मनाइँदै छ।

धार्मिक मान्यताअनुसार कागलाई यमराजको सन्देशवाहकका रूपमा पूजा गर्ने परम्परा छ। यस दिन कागलाई दहीभातलगायत मिठा खानेकुरा दिएर पूजा गर्ने चलन रहेको छ।

कागलाई पूजा गर्दा यमराजको सन्देश राम्रो पुग्ने र संकटबाट मुक्ति मिल्ने धार्मिक विश्वास छ। काग तिहारले पक्षीप्रति सम्मान, प्रकृतिप्रतिको कृतज्ञता र मानिस तथा जीवजन्तुबीचको सहअस्तित्वको सन्देशसमेत दिने गर्दछ।