लमजुङकै शैक्षिक इतिहास र गौरवमय विरासत बोकेको बेसीसहर नगरपालिका वडा नम्बर १, उदिपुरमा अवस्थित श्री जनकल्याण माध्यमिक विद्यालयको ७५औँ स्थापना दिवस अर्थात् हीरक महोत्सव लाई ऐतिहासिक रूपमा सफल बनाउन हीरक महोत्सव तयारी सञ्चालन समिति र मूल समितिको विशेष बैठक सफलतापूर्वक सम्पन्न भएको छ। 

विद्यालय प्रशासन, व्यवस्थापन समिति र स्थानीय सरोकारवालाहरूको संयुक्त टोलीले गृहकार्यलाई तीव्रता दिँदै महोत्सवका सन्देशहरूलाई व्यापक बनाउने रणनीतिक निर्णयहरू गरेको हो। उदिपुरको मुख्य ऐतिहासिक धरोहरका रूपमा रहेको यस विद्यालयको हीरक महोत्सव तयारीले यतिबेला नयाँ मोड र ठुलो सांगठनिक उचाइ लिएको छ। आज विद्यालय परिसरमा आयोजित विशेष बैठकमा विद्यालय व्यवस्थापन समितिका पूर्व अध्यक्ष, प्रतिष्ठित सामाजिक व्यक्तित्व एवं केन्द्रीय राजनीतिमा स्थापित रहनुभएका वरिष्ठ नेता कृष्ण प्रसाद अधिकारीको गरिमामय उपस्थिति रहेको थियो। बैठकमा आफ्नो महत्त्वपूर्ण धारणा राख्दै पूर्व अध्यक्ष अधिकारीले विद्यालयको गरिमा र उदिपुरको पहिचानसँग जोडिएको यस हीरक महोत्सवलाई भव्य बनाउन आफ्नो तर्फबाट पूर्ण तयारी, भौतिक, आर्थिक र सांगठनिक योगदान दिने दृढ प्रतिबद्धता व्यक्त गर्नुभएको छ। यसैगरी, बैठकमा बेसीसहर नगरपालिका वडा नम्बर १ का पूर्व वडाध्यक्ष बलराम श्रेष्ठ, वर्तमान वडाध्यक्ष दुर्गा बहादुर बुढाथोकी र विद्यालय व्यवस्थापन समितिका वर्तमान अध्यक्ष शंकर पन्तको ओझिलो उपस्थिति रहेको थियो। उहाँहरूले स्थानीय सरकार र समुदायको आपसी समन्वयमार्फत महोत्सवलाई एक नमुना उत्सवका रूपमा सम्पन्न गराउने साझा सङ्कल्प दोहोर्‍याउनुभयो।

विशेष गरी आजको बैठकले हीरक महोत्सवलाई पूर्ण रूपमा सफल बनाउन देश-विदेशमा छरिएर रहेका पूर्व विद्यार्थीहरूको योगदान नै सबैभन्दा मुख्य कडी रहने विशेष राजनीतिक एवं सामाजिक निष्कर्ष निकालेको छ। यस विद्यालयले आफ्नो ७५ वर्ष लामो गौरवशाली इतिहासमा देश र अन्तर्राष्ट्रिय स्तरमै सफल एवं अव्वल विद्यार्थीहरू उत्पादन गरिसकेको छ, जसमा प्रतिष्ठित डाक्टर, इन्जिनियर लगायत हरेक प्राविधिक तथा राष्ट्रिय सेवाका क्षेत्रमा स्थापित व्यक्तित्वहरू रहनुभएको छ। विद्यालय प्रशासनका अनुसार एक कक्षा पढेका हुन् वा कुनै पनि तह पूरा गरेका हुन्, सम्पूर्ण पूर्व विद्यार्थीहरू नै यस हीरक महोत्सवका वास्तविक प्रमुख पात्र र खम्बाहरू हुन्। उनीहरूलाई पूर्ण रूपमा जागरूक र गोलबद्ध बनाउन स्थानीय अभिभावकहरू, पूर्व शिक्षक शिक्षिकाहरू, वर्तमान शिक्षक कर्मचारी, व्यवस्थापन समितिका वर्तमान तथा पूर्व अध्यक्षहरू र सिंगो समुदायको मुख्य भूमिका रहने निश्चित गरिएको छ।

विद्यालयको प्रतिष्ठा जोडिएको यो महाउत्सव सफल पार्न र यसको कमान्ड सम्हाल्न प्रधानाध्यापक सूर्यबहादुर अधिकारीको निरन्तरको सक्रियता, कुशल व्यवस्थापकीय मेहेनत र अहोरात्र खटिने कार्यशैलीले हीरक महोत्सव सफल हुवे विश्वास गरिएको छ। प्रधानाध्यापक अधिकारीको यस मेहेनतलाई सफल बनाउन र प्रचारप्रसारलाई तीव्र पार्न आगामी १६, १७ र १८ गते साविकका सबै वडाहरूमा विशेष टोली टिम बनाएर पूर्व सूचना अभियान लैजाने र काठमाडौँ तथा चितवनमा वृहत् पूर्व विद्यार्थी भेलाहरू आयोजना गर्ने कार्यतालिका पारित गरिएको छ। 

हीरक महोत्सव प्रचार प्रसार विभाग समितिका अध्यक्ष रामकुमार श्रेष्ठ, अग्रणी महिला नेतृत्व सुनिता पाण्डे र शोभा खवास सहित उपस्थित सम्पूर्ण सरोकारवालाहरूले आ-आफ्नो ठाउँबाट अधिकतम सहयोग गर्ने निर्णय गरेसँगै, लमजुङ जिल्लाकै सबैभन्दा सफल सामुदायिक विद्यालयका रूपमा स्थापित जनकल्याण माविको यो हीरक महोत्सव जिल्लाकै इतिहासमा सबैभन्दा अव्वल र भव्य हुनेमा प्रधानाध्यापक सूर्यबहादुर अधिकारीसहित सम्पूर्ण शिक्षक वर्ग, व्यवस्थापन समिति र अभिभावकहरू पूर्ण रूपमा ढुक्क भएर अगाडि बढेका छन्।