नेपालमा गत बुधबार आएको बाढीबाट प्रभावित नागरिकका लागि चीन सरकारले आपत्कालीन राहतस्वरूप २० लाख अमेरिकी डलर सहयोग उपलब्ध गराएको छ।

चिनियाँ दूतावासले आइतबार सामाजिक सञ्जाल एक्समार्फत दिएको जानकारीअनुसार नेपालका लागि चिनियाँ राजदूत महामहिम झाङ माओमिङले आइतबार अर्थमन्त्री डा. स्वर्णिम वाग्लेसँग भेट गरी उक्त सहयोग नेपाल सरकारलाई हस्तान्तरण गरेका हुन्।

यसै अवसरमा चिनियाँ रेडक्रस सोसाइटीले प्रधानमन्त्री दैवी प्रकोप उद्धार कोषका लागि थप २ लाख अमेरिकी डलर सहयोग गरेको दूतावासले जनाएको छ।

यससँगै बाढी तथा अन्य विपद्बाट प्रभावित नेपाली नागरिकको राहत तथा उद्धारका लागि चीनबाट नेपालले कुल २२ लाख अमेरिकी डलर बराबरको सहायता प्राप्त गरेको छ। चीनको उक्त सहयोग बाढीबाट प्रभावित नागरिकको राहत, उद्धार तथा पुनःस्थापनाका लागि उपयोग गरिने जनाइएको छ।