एक सातापछि विद्युत् उत्पादन सुरु गरी राष्ट्रिय प्रसारण लाइनमा जोडिने तयारीमा रहेको रसुवाको निर्माणाधीन लाङटाङ खोला जलविद्युत् आयोजना भोटेकोशी नदीमा आएको भीषण बाढीले तहसनहस भएको छ ।

बाढीले आयोजनाको पावर हाउस पूर्ण रूपमा बगाएको छ भने सुरुङभित्र काम गरिरहेका करिब ६० जना कर्मचारी तथा मजदुर बुधबार बिहानदेखि सम्पर्कविहीन छन् ।

निर्माण कम्पनी मल्टी इनर्जी प्रा.लि.का प्रबन्ध निर्देशक विजयमोहन भट्टराईका अनुसार बाढी आउँदा आयोजनाका कर्मचारी तथा मजदुर सुरुङभित्र कङ्क्रिट ढलानको काममा व्यस्त थिए । आयोजनामा कम्पनीका इन्जिनियर, ओभरसियर, गार्ड र भान्छेसहित २५ जना तथा पेटी कन्ट्र्याक्टरतर्फका करिब ३५ जना मजदुर कार्यरत थिए ।

चीनको तिब्बततर्फबाट भोटेकोशी नदीमा आएको बाढीले आयोजनाको संरचनामा ठूलो क्षति पुर्‍याएको हो । भट्टराईका अनुसार बाढी प्राकृतिक जलसतहभन्दा करिब १२५ मिटर माथिसम्म पुगेको थियो ।

‘अर्को साता बत्ती बाल्ने तयारी थियो । तीन दिनअघि मात्रै फिल्डमा गएर आएको थिएँ,’ भट्टराईले भने, ‘आयोजना त फेरि बनाउँला । तर हाम्रा काबिल इन्जिनियर र मजदुरहरूको अवस्था अज्ञात हुँदा मन बेचैन भएको छ ।’

स्वतन्त्र ऊर्जा उत्पादकहरूको संस्था नेपाल (इप्पान) का सचिवसमेत रहेका भट्टराईले घटनालाई सामान्य बाढी नभई ‘महाप्रलय’को संज्ञा दिएका छन् ।

उनले आयोजनाको क्षतिभन्दा अहिले सम्पर्कविहीन कर्मचारी तथा मजदुरको खोजी र उद्धारलाई प्राथमिकता दिनुपर्ने बताए । ‘प्रोजेक्ट त फेरि बनाऔँला, तर मान्छे कहाँबाट ल्याउने ?’ भन्दै उनले भौतिक क्षतिभन्दा मानवीय क्षति नै सबैभन्दा ठूलो चिन्ताको विषय भएको बताए ।