पाकिस्तानका पूर्वप्रधानमन्त्री इमरान खानलाई स्वास्थ्य परीक्षणका लागि इस्लामाबादस्थित शिफा इन्टरनेसनल अस्पताल लगिएको केही समयपछि शुक्रबार रावलपिन्डीस्थित अदियाला जेल फिर्ता गरिएको छ।

सर्वोच्च अदालतको आदेशअनुसार खानलाई स्वास्थ्यको विस्तृत मूल्यांकनका लागि निजी अस्पताल लगिएको थियो। अदालतले उनलाई दुई दिनभित्र अस्पताल सारेर आवश्यक परीक्षण गराउन सङ्घीय सरकारलाई निर्देशन दिएको थियो।

अधिकतम सुरक्षा व्यवस्थाबीच अस्पताल लगिएका खानको आवश्यक स्वास्थ्य परीक्षण र प्रारम्भिक चिकित्सकीय जाँच पूरा भएपछि जेल फिर्ता गरिएको अधिकारीहरूले बताएका छन्। उनको सुरक्षाका लागि ८ सयभन्दा बढी सुरक्षाकर्मी परिचालन गरिएको थियो।

खान सन् २०२३ देखि जेलमा छन्। तोशाखाना मुद्दासँग सम्बन्धित १४ वर्षको सजाय भोगिरहेका खानमा रक्तचापमा उतारचढाव देखिएपछि स्वास्थ्य परीक्षण गराइएको हो। पछिल्ला जेल मेडिकल अभिलेखमा समेत स्वास्थ्यसम्बन्धी समस्या उल्लेख गरिएको बताइएको छ।