रसुवामा आएको बाढीपहिरोबाट प्रभावित नागरिकको राहत तथा पुनःस्थापनाका लागि गैरे प्रतिष्ठान प्रालि बुटवलले ५ लाख ५५ हजार ५५५ रुपैयाँ सहयोग गरेको छ।

प्राकृतिक विपत्तिका कारण ठूलो जनधनको क्षति व्यहोरेका रसुवाका बाढीपहिरो प्रभावित परिवारलाई सहयोग गर्ने उद्देश्यले प्रतिष्ठानले उक्त रकम प्रधानमन्त्री दैवी प्रकोप उद्धार कोषमा जम्मा गरेको हो।

गैरे प्रतिष्ठानका निर्देशक प्रवेशराज गैरेले प्राकृतिक विपत्तिमा परेका नागरिकको पीडामा साथ दिनु सबैको सामाजिक दायित्व भएको बताए। विपत्तिबाट प्रभावित परिवारलाई राहत र पुनःस्थापनामा सहयोग पुगोस् भन्ने उद्देश्यले प्रतिष्ठानले आफ्नो सामाजिक उत्तरदायित्वअन्तर्गत सहयोग गरेको उनले जानकारी दिए।

गैरेले प्राकृतिक विपत्तिले निम्त्याएको पीडाले आफूहरूलाई समेत मर्माहत बनाएको उल्लेख गर्दै कठिन परिस्थितिमा रहेका पीडित परिवारप्रति गहिरो समवेदना व्यक्त गरे।

उनका अनुसार बाढीपहिरोबाट प्रभावित नागरिकलाई राहत उपलब्ध गराउन प्रतिष्ठानले प्रधानमन्त्री दैवी प्रकोप उद्धार कोषमा रकम जम्मा गरेको हो। प्रतिष्ठानले ५ लाख ५५ हजार ५५५ रुपैयाँ सहयोग गरिएको बैंक कारोबार विवरणसमेत सार्वजनिक गरेको छ।