नुवाकोट । ऊर्जा, जलस्रोत तथा सिँचाइमन्त्री विराज भक्त श्रेष्ठ बाढी प्रभावित क्षेत्र नुवाकोटको त्रिशूली पुगेका छन्। बाढीबाट प्रभावित विभिन्न जलविद्युत् आयोजनाको निरीक्षण तथा उद्धार कार्यको अवस्थाबारे जानकारी लिन मन्त्री श्रेष्ठ नुवाकोट पुगेका हुन्।

मन्त्री श्रेष्ठले त्रिशूलीस्थित सैन्य तालिम केन्द्रमा गृहमन्त्री सुधन गुरुङसँग उद्धार तथा राहत कार्यबारे छलफल गरेका छन्। गृहमन्त्री गुरुङ सोही सैन्य तालिम केन्द्रबाट उद्धार कार्यको समन्वय गरिरहेका छन्।

छलफलका क्रममा जलविद्युत् आयोजनाका सुरुङमा फसेकाहरूको खोजी तथा उद्धारमा खटिएका नेपाली सेनाका उच्च अधिकारीहरूले उद्धार कार्यको पछिल्लो अवस्थाबारे मन्त्री श्रेष्ठलाई जानकारी गराएका थिए।

मन्त्री श्रेष्ठसँग प्रधानमन्त्रीका राजनीतिक सल्लाहकार असिम शाह पनि नुवाकोट पुगेका छन्। मन्त्री श्रेष्ठले आजै हेलिकप्टरमार्फत रसुवास्थित विभिन्न जलविद्युत् आयोजनाका उद्धार स्थलको निरीक्षण गर्ने कार्यक्रम छ। उनले बाढीबाट प्रभावित परिवारसँग समेत भेटघाट तथा छलफल गर्ने बताइएको छ।