काठमाडौँ । युएईले रोकेको भिजिट तथा श्रम भिसालगायतको विषयमा त्यहाँका नेपाली राजदूत तेजबहादुर क्षेत्रीले आज युएईको परराष्ट्र मन्त्रालयमा कन्सुलर मामिला हेर्ने कार्यवाहक सहसचिव राशिद मदहरसँग भेटवार्ता गरेका छन् । 

युएईस्थित परराष्ट्र मन्त्रालयमै मंगलबार भएको भेटमा दुवै देशबिच श्रम सहकार्य, कन्सुलर सेवामा देखिएका चुनौती, कामदारले भोग्नुपर्ने झन्झट, कागजी प्रक्रिया र सेवा प्रवाहलाई अझ सुव्यवस्थित बनाउने विषयमा विस्तृत छलफल भएको नेपाली दूतावासले जनाएको छ । 

साथै हाल युएईमा रोजगारी तथा भ्रमणका लागि आउने नेपालीका लागि भिसा प्रक्रिया अझ सहज र छरितो बनाउन सकिने उपायबारे पनि सकारात्मक कुराकानी भएको दूतावासले जनाएको छ ।

सो भेटमा युएई परराष्ट्र मन्त्रालयका विदेशी नागरिक शाखाका निर्देशक डा. माजिद अल मान्सुरी तथा नेपाली दूतावासकी काउन्सेलर तथा उपनियोग प्रमुख रन्जिता दाहाल पनि उपस्थित थिए ।

नेपाली दूतावासले भेटवार्ताले दुवै मुलुकबिचको आपसी समन्वय बलियो बनाउने र युएईमा रहेका नेपाली कामदार तथा नागरिकका हित संरक्षणमा सहयोग पुग्ने विश्वास व्यक्त गरेको छ ।