मङ्सिर ४ को निर्वाचन नतिजा आउने क्रम जारी छ । प्रतिनिधि सभाको प्रत्यक्षतर्फ १६५ निर्वाचन क्षेत्रमध्ये ११५ क्षेत्रको नतिजा आइसकेको छ भने अरू क्षेत्रको धमाधम आइरहेको छ ।  नेपाली कांग्रेस, नेकपा माओवादी केन्द्र, नेकपा एकीकृत समाजवादी, लोसपा र जनमोर्चाले १६५ निर्वाचन क्षेत्रमा भागबण्डा गरेर निर्वाचन लडेपनि माओवादी र समाजवादीलाई कांग्रेसको तुलनामा फाइदा हुन नसकेको प्राप्त परिणामले देखाइसकेको छ । 

परिणाम आउने क्रमसँगै ती पार्टीका नेताहरूबाट समेत असन्तुष्टि पोख्न थालेको देखिन्छ । सुरुमा गठबन्धनमा ४७ सिट पाएको नेकपा माओवादीले पछि ४१ सिटमा आफ्ना उम्मेदवार उठाएको थियो । उम्मेदवारी दिएका ४१ मध्ये माओवादीले अहिलेसम्म १२ निर्वाचन क्षेत्रमा मात्र जित निकालेको छ । बाँकी ६ स्थानमा उसको अग्रता छ । यदि अग्रता रहेका स्थानमा समेत जित निकाले माओवादीले प्रत्यक्षतर्फ १८ सिट जित्ने छ । यसरी हेर्दा गठबन्धनमा गरिएको भागबण्डामा पाएको सिटमध्ये करिब ४४ प्रतिशत मात्रै जित्ने देखिन्छ ।

यसअघि प्रत्यक्षतर्फमात्रै ३६ सिट र १७ सिट समानुपातिकमा जितेर ५३ सिटसहित तेस्रो ठुलो दल बनेको थियो । तर माओवादी केन्द्र संसद् सङ्ख्याका हिसाबले यो पटक खुम्चने निश्चित भएको छ । किनभने समानुपातिकमा पनि शुक्रबार दिउँसोसम्म माओवादीले ४ लाख ६० हजार मत मात्रै पाएको छ । यही आधारमा सबै नतिजा आउँदा माओवादीले समानुपातिकतर्फ १० देखि १२ लाख हाराहारी मात्रै मत पाउने देखिन्छ । यस हिसाबले समानुपातिकमा कुनै चमत्कार नभएमा प्रतिनिधि सभामा माओवादीको जम्मा सिट २८ देखि ३० हुने देखिन्छ ।

समाजवादीलाई राष्ट्रिय पार्टी बन्नै सकस

माओवादीमात्रै होइन नेकपा एकीकृत समाजवादीलाई पनि गठबन्धन फाइदा भन्दा घाटा हुने देखिएको छ । सत्ता गठबन्धनमा भएको भागबण्डामा एकीकृत समाजवादीले प्रतिनिधि सभाका १९ सिट पाएको थियो । ती मध्ये १० सिटमा जित निकालेको छ भने, बाँकी १९ सिट गुमाउने निश्चित जस्तै छ ।

नेकपा एकीकृत समाजवादीले शुक्रबारसम्म रौतहट क्षेत्र न. १ मा माधवकुमार नेपाल, बारा क्षेत्र न. ४ – मा कृष्णकुमार (किसान) श्रेष्ठ, धादिङ क्षेत्र न. १मा राजेन्द्रप्रसाद पाण्डे, दाङ क्षेत्र न. १ मा मेटमणि चौधरी, सल्यानमा प्रकाश बुढाथोकी (ज्वाला), डोल्पामा धनबहादुर बुढा मगर, दैलेख क्षेत्र न. १ – मा अम्बरबहादुर थापा,अछाम क्षेत्र न. १ मा शेरबहादुर कुँवर, बझाङमा भानुभक्त जोशी र डोटीमा प्रेमबहादुर आले निर्वाचित भैसकेका छन् ।

समाजवादीले उदयपुर २ मा हार बेहोरेको छ भने रुपन्देही क्षेत्र नम्बर का उम्मेदवार राजु गुरुङको उम्मेदवारी नै बदर भएको थियो । त्यस्तै पाल्पा क्षेत्र न. २ – सोमप्रसाद पाण्डे,गुल्मी क्षेत्र न. २ – रामकुमारी झाँक्री, मकवानपुर क्षेत्र न. २ – विरोध खतिवडा पराजित भैसकेका छन् । काठमाडौँ क्षेत्र न. ८ बाट जीवनराम श्रेष्ठ र ललितपुर क्षेत्र न. २ – कृष्णलाल महर्जन र कास्की २ बाट श्रीनाथ बराल पनि पराजित भैसकेका छन् । इलाम क्षेत्र न. १ मा झलनाथ खनालको परिणाम आइसकेको छैन । त्यो क्षेत्रमा खनाल एमाले उम्मेदवारभन्दा पछि छन् । समानुपातिकतर्फ पनि यो पार्टीको मत खासै देखिँदैन । किनभने १६० क्षेत्रको मत गणना सुरु भैसक्दा शुक्रबारसम्म समानुपातिकतर्फ ७५ हजार मत मात्रै आएको छ । यही हिसाबले यो पार्टी तीन प्रतिशत थ्रेसहोल्ड कटाएर राष्ट्रिय पार्टीको मान्यता नै नपाउने देखिएको छ ।