टोकियो — अमेरिका–इरान शान्ति सम्झौता पछि स्ट्रेट अफ होर्मुजमार्फत तेल तथा ग्यास ढुवानी पुनः सुचारु गर्न सहयोगका लागि सेना पठाउने विषयमा जापानले अझै कुनै निर्णय गरेको छैन।

अमेरिकी राष्ट्रपति डोनाल्ड ट्रम्पले शुक्रबारदेखि तेल तथा ग्यास ढुवानीका लागि महत्वपूर्ण मानिने स्ट्रेट अफ होर्मुज “पूर्ण रूपमा खुला” भएको दाबी गर्दै जलमार्गबाट आवागमन सुरक्षित बनाउन अन्तर्राष्ट्रिय सहयोग आवश्यक रहेको बताएका छन्।

ट्रम्पले जापानसहितका सहयोगी मुलुकहरूलाई उक्त क्षेत्रमा युद्धपोत पठाएर मार्ग पुनः सञ्चालनमा सहयोग गर्न आग्रह गरेका छन्।

तर जापानी रक्षामन्त्री सिन्जिरो कोइजुमीले मङ्गलबार यसबारे कुनै निर्णय नभएको स्पष्ट पारेका छन्। उनले अमेरिकासहित सम्बन्धित देशहरूसँग नजिकको परामर्श गर्दै परिस्थितिको सावधानीपूर्वक मूल्याङ्कन तथा अन्तर्राष्ट्रिय कानुनअनुसार आवश्यक कदमबारे विचार भइरहेको बताए।

यसअघि पनि सत्तारूढ लिबरल डेमोक्र्याटिक पार्टीका केही वरिष्ठ नेताहरूले युद्धविरामपछि स्ट्रेट अफ होर्मुजमा अवरोध हटाउन जापानले आवश्यक तैनाथीबारे विचार गर्नुपर्ने धारणा राखेका थिए।

फ्रान्समा जारी जी–सेभेन शिखर सम्मेलनमा सहभागी प्रधानमन्त्री साने ताकाइचीले पनि युद्धविरामपछि जापानसँग विभिन्न विकल्प खुला रहने बताएका छन्।

यसअघि सन् १९९१ को खाडी युद्धपछि जापानी आत्मरक्षा बलले माइन–क्लियरेन्स अपरेसनमा भाग लिएको उदाहरणसमेत रहेको छ। अहिलेको परिस्थितिमा जापानले के भूमिका खेल्ने भन्ने विषयमा छलफल जारी रहेको बताइएको छ।