नेकपा माओवादी केन्द्रका नेता बर्षमान पुनले पार्टी र गठबन्धनभित्र मन्त्रीहरुको हेरफेरबारे कुनै छलफल नभएको बताएका छन् ।

‘अहिले सरकारका मन्त्रीहरुको हेरफेरबारे गठबन्धनमा कुनै पनि छलफल भएको छैन । र अहिले त्यसको एजेण्डा पनि बनेको छैन’, नेता पुनले सोमबारको केन्द्रीय कमिटी बैठकपछि सञ्चारकर्मीलाई जानकारी दिए । फरक प्रसंगमा नेता पुनले अर्थमन्त्रीसँग प्रधानमन्त्री आफैले कुरा गर्नुपर्ने बताए ।

‘अहिलेको प्रधानमन्त्रीको मुख्य जिम्मेवारी कोभिडबाट बिथोलिएको अर्थतन्त्र सम्हाल्ने हो । त्यसमा स्वभाविक रुपमा एक्सपर्टिजको हिसाबले र मन्त्रालयको हिसाबले अर्थमन्त्रीको दायित्व हुन्छ’, नेता पुनको भनाइ छ ।  उनले प्रधानमन्त्रीले आफ्नो अर्थमन्त्रीसँग विश्वासको वातावरण बनाएर काम गरे नगरे भोलि एवीसीडी जो अर्थमन्त्री आएपनि सक्सेस हुन नसक्ने बताए ।