रोमानियामा जारी राजनीतिक अनिश्चितता अन्त्य गर्ने प्रयासस्वरूप राष्ट्रपति निकुसोर डानले एड्रियन भेस्टियालाई प्रधानमन्त्रीका रूपमा मनोनीत गरेका छन्। अघिल्लो उम्मेदवारले संसद्मा आवश्यक समर्थन जुटाउन नसकेपछि राष्ट्रपति डानले नयाँ नेतृत्वमार्फत स्थिर सरकार गठनको प्रयास अघि बढाएका हुन्।

५३ वर्षीय भेस्टिया मध्य रोमानियाको ब्रासोभ काउन्टीका अनुभवी राजनीतिज्ञ तथा नेसनल लिबरल पार्टीका वरिष्ठ नेता हुन्। उनी यसै महिनामा राष्ट्रपति डानले प्रधानमन्त्री पदका लागि मनोनयन गरेका दोस्रो व्यक्ति हुन्।

यसअघि प्रधानमन्त्रीका लागि प्रस्तावित युजेन टोम्याकले पर्याप्त राजनीतिक समर्थन जुटाउन नसकेपछि आफ्नो जनादेश फिर्ता लिएका थिए। संसद्मा मन्त्रिपरिषद् प्रस्तुत गर्ने समयसीमा पूरा हुन नसकेपछि राष्ट्रपति डानले पुनः नयाँ विकल्प अघि सारेका हुन्।

बुखारेस्टस्थित कोट्रोसेनी दरबारमा आयोजित कार्यक्रममा राष्ट्रपति डानले भेस्टियालाई प्रशासनिक अनुभव र व्यवस्थापकीय क्षमताका आधारमा योग्य उम्मेदवारका रूपमा प्रस्तुत गरे। उनले भेस्टियाले स्थानीय तहदेखि राष्ट्रिय स्तरसम्म विभिन्न जिम्मेवारी सफलतापूर्वक सम्हालेको बताए।

भेस्टियाले सानो सहरको मेयर, ब्रासोभ काउन्टी परिषद्का अध्यक्ष तथा विकास मन्त्रीका रूपमा काम गरिसकेका छन्। विकास मन्त्री रहँदा उनले युरोपेली कोष आकर्षित गरी महत्वपूर्ण परियोजनाहरू अघि बढाएको उल्लेख गरिएको छ।

राष्ट्रपति डानले उनलाई पश्चिम समर्थक राजनीतिज्ञ र बजेट व्यवस्थापनमा अनुभवी नेता भन्दै नयाँ जिम्मेवारी सफलतापूर्वक पूरा गर्ने विश्वास व्यक्त गरेका छन्। भेस्टियाले भने आफू वास्तविक सुधार लागू गर्दै रोमानियालाई पश्चिम समर्थक मार्गमा अघि बढाउने प्रतिबद्धता जनाएका छन्।

प्रधानमन्त्री पदका लागि यो लगातार दोस्रो मनोनयन हो, जुन यसअघि तत्कालीन प्रधानमन्त्री इलि बोलोजन अविश्वास प्रस्तावबाट पदच्युत भएपछि सुरु भएको राजनीतिक संकटसँग जोडिएको छ।

युरोपेली सङ्घ (ईयू) भित्र उच्च बजेट घाटा, मुद्रास्फीति र आर्थिक मन्दीको चुनौती झेलिरहेको रोमानियामा राजनीतिक स्थिरता पुनःस्थापना गर्न यो नियुक्तिलाई महत्वपूर्ण कदमका रूपमा हेरिएको छ। आगामी आम निर्वाचन सन् २०२८ मा मात्र हुने भएकाले वर्तमान सरकार गठन प्रक्रियालाई विशेष महत्त्व दिइएको छ।