नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले अमेरिकी सहयोग परियोजना एमसिसी पारित गर्न संकल्प प्रस्ताव ल्याउने कुरा सबैभन्दा पहिला आफूले गरेको बताएका छन्। 

सोमबार आफ्नो निवास खुमलटारमा आयोजित पत्रकार सम्मेलनमा बोल्दै प्रचण्डले तत्कालीन नेकपाका अध्यक्षका केपी शर्मा ओलीका पालामा नै आफूले एमसिसीमा संकल्प वा अरू कुनै नाम दिएर संसदबाट पारित गरौं भन्ने प्रस्ताव ल्याएको बताए।

आफूले त्यो प्रस्ताव तत्कालीन प्रमुख प्रतिपक्षी दलका नेता शेरबहादुर देउवासँग राखेको उनले बताए। 

‘देउवाले हुन्छ/हुन्छ भन्नुभयो। तर ओलीले अरू कुनै प्रस्ताव जरूरी छैन। एक अक्षर पनि परिवर्तन हुँदैन भन्नुभयो,’ प्रचण्डले भने,‘त्यसपछि त प्रतिनिधि सभा विघटन के-के भयो।’ पछिल्लो समय पनि आफूले नै व्याख्यात्मक घोषणामार्फत् एमसिसी पारित गर्ने प्रस्ताव ल्याएको प्रचण्डले दाबी गरे।

आइतबार संसदबाट पारित भएको व्याख्यात्मक घोषणाको कानुनी हैसियत हुने उल्लेख गर्दै  प्रचण्डले यो महाकाली सन्धीमा गरिएको संकल्प प्रस्तावजस्तो नभएको बताए।