प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले संसद् विघटन गरी निर्वाचनको मिति तोकेपछि सत्तारुढ दल नेपाल कम्युनिष्ट पार्टी (नेकपा) फुटकाे अन्तिम संघारमा पुगेको छ ।

प्रतिनिधिसभा विघटन भएपछि दुवै समूहले आगामी रणनीति तय गर्न गुटगत भेला र बैठक बोलाउने क्रमलाई तीव्रता दिएका छन् । दुवै पक्षले एकले अर्कालाई अनुशासनको कारबाही गर्ने गरी तयारी अघि बढाएका छन् भने दुवै पक्षले आ-आफ्नो बैठकलाई नै आधिकारिक भएको दाबी गर्न थालेका छन् ।

दुईतिहाइ बहुमतसहित सरकारको नेतृत्व गरिरहेको नेकपा आजैबाट औपचारिक विभाजनतर्फ जाने निश्चित भएको छ । आज प्रधानमन्त्री एवं पार्टी ओली र अर्का अध्यक्ष पुष्पकमल दाहाल प्रचण्ड तथा वरिष्ठ नेता माधवकुमार नेपाल दुवै समूहकाे  अलग-अलग केन्द्रीय कमिटीको बैठक आज बस्दै छ । दुवै पक्षले फरक फरक स्थानमा केन्द्रीय कमिटीको बैठक बोलाएका हुन् ।

प्रधानमन्त्री केपी शर्मा ओली पक्षले बिहान ९ बजे बैठक बोलाएको छ । अर्कोतर्फ पार्टी अध्यक्ष प्रचण्ड र नेपाल समूहले दिउँसो १ बजे बैठक बोलाएको छ । दुवै पक्षले एकले अर्कोलाई अनुशासनको कारबाही गर्ने उद्देश्यले आज केन्द्रीय कमिटी आह्वान गरेका हुन् ।  बैठकका लागि उपत्यकाबाहिर रहेका दुवै पक्षका केन्द्रीय सदस्य काठमाडौंमा भेला हुँदै छन् ।

प्रचण्ड-माधव नेपाल पक्षले प्रधानमन्त्री तथा पार्टी अध्यक्ष केपी शर्मा ओलीलाई अनुशासनको कारबाही गरिएको पत्र निर्वाचन आयोगमा पेश गरिसकेकाे छ ।

पार्टी एकता टुंगिन नपाउँदै प्रचण्डले एकता भंग गरेको अभियोगसहित निर्वाचन आयोगलाई जानकारी गराउने तयारी ओली पक्षको तयारी छ । प्रचण्डसहित अरू केहि नेतालाई पनि कारबाही गरेर निर्वाचन आयोगलाई जानकारी गराउने सम्भावना रहेको स्राेत बताउछ ।