नेपाल कम्युनिष्ट पार्टी (नेकपा)का ४ सांसदहरु संसद विघटन बदर गराउन भन्दै सर्वोच्च अदालत पुगेका छन् । सरकारको सिफारिसमा राष्ट्रपति विद्यादेवी भण्डारीले आइतबार संसद बिघटन गर्नुभएको थियो । त्यस निर्णय बदर गरिपाउ भन्दै नेकपाका प्रतिनिधिसभाका सांसदहरु रिटसहित मंगलबार सर्वोच्च पुग्नु भएको हो ।

सांसदहरु देव गुरुङ, कृष्णभक्त पोखरेल, रामकुमारी झाँक्री र शशी श्रेष्ठले बुझाएको रिटमा प्रतिनिधिसभाले आफ्नो अधिकार प्रयो गर्न पाउनु पर्ने र प्रतिनिधिसभाको सांसदहरुको लागि अनुकुल आदेशको माग गरिएको छ ।

सांसदहरुले संसद विघटन हुँदा ५ बर्षका लागि आफूहरुले नागरिकहरुलाई प्रतिनिधित्व गर्न पाएको अधिकारबाट पन्छ्याइएकोले त्यसलाई बदर गर्नुपर्ने उल्लेख गरिएको छ ।

त्यस्तै रिटमा, ‘प्रधानमन्त्रीले गरेको सिफारिस र सो सिफारिसका आधारमा राष्ट्रपतिद्वारा प्रतिनिधिसभा विघटनसम्बन्धी सम्पूर्ण कामकारबाही र सो सिफारिसका आधारमा भएका सम्पूर्ण कार्यहरु नेपालको संविधानको धारा १३३ को उपधारा २ र ३ बमोजिम उत्प्रेषणको आदेशबाट बदर गरी प्रतिनिधिसभाले गर्नुपर्ने कामहरु सम्पन्न गर्न आवश्यक र उपयुक्त आदेश जारी होस्’ भनिएको छ ।