चाडपर्वका बेला जुवातास नियन्त्रणका लागि प्रहरीले सक्रियता बढाएसँगै धनुषाका विभिन्न स्थानबाट ३७ जना पक्राउ परेका छन् ।

जिल्ला प्रहरी कार्यालय धनुषाका अनुसार कात्तिक ७ देखि २४ गतेसम्म पाँच दिनमा जनकपुरधामसहित जिल्लाका विभिन्न स्थानमा गरिएको छुट्टाछुट्टै कारबाहीमा उनीहरू पक्राउ परेका हुन् । पक्राउ पर्नेमा धनुषासहित महोत्तरी र सर्लाहीका व्यक्ति रहेका छन् ।

प्रहरी प्रवक्ता एवं डीएसपी ओमप्रकाश खनालका अनुसार पक्राउ परेकाहरूको साथबाट नेपाली रुपैयाँ ३ लाख ४८ हजार १०९ र भारतीय रुपैयाँ ३ हजार ५०० बरामद गरिएको छ । प्रहरीले तासका गड्डी, मोबाइल फोन तथा दुईवटा सवारीसाधनसमेत नियन्त्रणमा लिएको छ ।

प्रहरीले कात्तिक ७ गते जनकनन्दनी गाउँपालिका–२ बल्हाबाट सात जना, कात्तिक १९ गते जनकपुरधाम–२३ बसपार्कबाट दुई जना र कात्तिक २१ गते जनकपुरधाम–९ स्थित काली होटलबाट पाँच जनालाई पक्राउ गरेको थियो ।

त्यस्तै, कात्तिक २३ गते जनकपुरधाम–१४ रजौलस्थित साजन टेन्ट हाउसबाट १८ जना र कात्तिक २४ गते जनकपुरधाम–२ स्थित सिटी होटलबाट थप पाँच जना पक्राउ परेका थिए ।

पक्राउ परेका सबैमाथि आवश्यक अनुसन्धान तथा कानुनी प्रक्रिया अघि बढाइएको जिल्ला प्रहरीले जनाएको छ । प्रहरीले चाडपर्वका बेला जुवातासजन्य गतिविधि नियन्त्रण गर्न निगरानी र कारबाहीलाई तीव्र बनाएको छ ।