नेपाली कांग्रेसको १५औँ महाधिवेशनमा वरिष्ठ उपसभापति पदमा विश्वप्रकाश शर्मा र महिला उपसभापति पदमा पुष्पा भुसाल निर्विरोध निर्वाचित भएका छन्।

 मंगलबार साँझ ७ बजेसम्म तोकिएको मनोनयन दर्ताको समयभित्र दुवै पदमा शर्मा र भुसालबाहेक अन्य कुनै उम्मेदवारी नपरेपछि उनीहरू निर्विरोध निर्वाचित भएको निर्वाचन समितिले जनाएको छ।

 वरिष्ठ उपसभापतिमा शर्माको मात्रै उम्मेदवारी परेको थियो भने महिला उपसभापति पदमा पनि भुसालबाहेक अन्य उम्मेदवारले मनोनयन दर्ता गरेनन्। निर्धारित समयभित्र अन्य उम्मेदवारी नपरेपछि निर्वाचन समितिले दुवैलाई निर्विरोध निर्वाचित घोषणा गरेको हो।

 शर्मा यसअघि कांग्रेसको विशेष महाधिवेशनबाट उपसभापति बनेका थिए। भुसाल पनि विशेष महाधिवेशनबाटै महिला उपसभापति निर्वाचित भएकी थिइन्। १५औँ महाधिवेशनमार्फत कांग्रेसले पार्टीको नयाँ नेतृत्व चयन गरिरहेको छ।