तिब्बती शरणार्थीका नाममा गैरकानुनी रूपमा यात्रा अनुमतिपत्र (ट्राभल डकुमेन्ट) जारी गरेको आरोपमा परराष्ट्र मन्त्रालयका सहसचिव पुष्पराज भट्टराई पक्राउ परेका छन्।

नेपाल प्रहरीको केन्द्रीय अनुसन्धान ब्युरो (सीआईबी) ले राहदानी ऐनअन्तर्गतको कसुरमा उनलाई सोमबार त्रिपुरेश्वरबाट नियन्त्रणमा लिएको हो। जिल्ला सरकारी वकिल कार्यालय काठमाडौँमा राहदानी कसुरसम्बन्धी मुद्दा दायर भएसँगै सीआईबीको टोलीले उनलाई पक्राउ गरेको ब्युरोका प्रवक्ता अनुप शमशेर जबराले जानकारी दिए।

सीआईबीका अनुसार गैरकानुनी रूपमा जारी गरिएको यात्रा अनुमतिपत्रसहित उपस्थित भएका व्यक्तिको राष्ट्रियतामाथि शङ्का लागेपछि काठमाडौँस्थित जर्मन राजदूतावासले सोधपुछ तथा अनुसन्धान सुरु गरेको थियो। त्यस क्रममा दूतावासले २०६८ जेठ २० गते पाँच थान सक्कल यात्रा अनुमतिपत्र थप अनुसन्धान र कारबाहीका लागि ब्युरोमा पठाएको थियो।

उक्त प्रकरणको अनुसन्धानका क्रममा तत्कालीन समयमा परराष्ट्र मन्त्रालयको कन्सुलर शाखामा शाखा अधिकृतका रूपमा कार्यरत भट्टराईको प्रत्यक्ष संलग्नता देखिएको सीआईबीले जनाएको छ। पक्राउ परेका भट्टराईमाथि राहदानी ऐनसम्बन्धी कसुरमा थप अनुसन्धान प्रक्रिया अगाडि बढाइएको प्रहरीले जनाएको छ।