काठमाडौं, असार १

अमेरिका र इरानबीच युद्ध अन्त्यका लागि शान्ति सम्झौता भएको खबर सार्वजनिक भएसँगै अन्तर्राष्ट्रिय तेल बजारमा कच्चा तेलको मूल्यमा उल्लेख्य गिरावट आएको छ। एसियाली बजारको प्रारम्भिक कारोबारमै मूल्य ओरालो लागेको हो।

अन्तर्राष्ट्रिय बजारमा कच्चा तेलको प्रमुख सूचक ‘ब्रेन्ट क्रुड’ ३.८ प्रतिशतले घटेर प्रतिब्यारेल ८४.०२ अमेरिकी डलरमा झरेको छ। यस्तै, अमेरिकी बजारमा कारोबार हुने तेलको मूल्य पनि ४.१ प्रतिशतले घट्दै प्रतिब्यारेल ८१.४० डलर कायम भएको छ।

मध्यस्थकर्ताका रूपमा भूमिका खेलेको पाकिस्तानले सम्झौताको घोषणा गरेलगत्तै बजारमा असर देखिएको हो। पाकिस्तानी प्रधानमन्त्री शहबाज सरिफका अनुसार आगामी जुन १९ मा स्विट्जरल्यान्डमा सम्झौताको औपचारिक हस्ताक्षर हुनेछ।

यसैबीच अमेरिकी राष्ट्रपति डोनाल्ड ट्रम्पले सामाजिक सञ्जालमार्फत अब ‘तेलको प्रवाह सुचारु हुने’ बताएका छन्। ट्रम्पका अनुसार रणनीतिक रूपमा महत्त्वपूर्ण हर्मुज जलमार्ग पुनः खुला हुनेछ।

विश्लेषकहरूका अनुसार विगत महिनाहरूमा द्वन्द्वका कारण प्रभावित भएको ऊर्जा आपूर्तिमा सुधार आउने अपेक्षाले बजारमा सकारात्मक प्रभाव परेको हो। युद्धको समयमा प्रतिब्यारेल करिब १२० डलरसम्म पुगेको ब्रेन्ट क्रुड अहिले सम्झौताको खबरसँगै घटेर ८० डलरको मध्य तहमा आएको छ।

विश्वको करिब २० प्रतिशत कच्चा तेल र तरल प्राकृतिक ग्यास आपूर्ति हुने हर्मुज जलमार्ग द्वन्द्वका कारण प्रभावित हुँदै आएको थियो। द्वन्द्व सुरु हुनुअघि तेलको मूल्य करिब ७० डलर आसपास रहेकोमा पछिल्ला महिनामा तीव्र उतारचढाव देखिएको थियो।