नेपाली कांग्रेसका केन्द्रीय सदस्य शेखर कोइरालाले केन्द्रीय समिति बैठक लाइभ गरिएकोबारे प्रश्न उठाएका छन्।

आइतबारको केन्द्रीय समिति बैठकमा धारणा राख्दै कोइरालाले भने, ‘बैठक लाइभ भइरहेको छ, बडा असजिलो लागिरहेको छ।’

उनले पहिलो पटक केन्द्रीय समिति बैठक लाइभ भएकोले पनि असजिलो लागेको हुन सक्ने बताए।

‘सभापतिजीलाई लागेको होला। पहिले नेताजीहरूले लोकरिझ्याइँको कुरा गरेको भएर ल त बैठक लाइभ गरौं भन्नुभएको होला,’ उनले भने, ‘राम्रै भएको छ भन्ने पनि लाग्छ। तर सधैं यसरी जाँदा असजिलो हुन्छ भन्ने लाग्छ।’

लाइभ गर्ने भनेपछि महामन्त्रीले आफूहरूलाई चिट थमाएको पनि उनको भनाइ छ। ‘महामन्त्रीले अन्य पार्टीबारे पटक्कै नबोल्नु भनेर चिट थमाइदिनुभयो, अनि कस्तो केन्द्रीय समिति बैठक हुने हो मैले ठम्याउन सकेको छैन,’ कोइरालाले भने।

यस्तो छ कोइरालाले केन्द्रीय समितिमा राखेको धारणा:

आदरणीय सभापतिज्यू, पदाधिकारीज्यूहरु र उपस्थित केन्द्रिय सदस्यहरु,

आज हामी झण्डै एकवर्षको अन्तराल पछि यहाँ भेला भएका छौँ। कैयन साथीहरुलाई विधान विपरित यसरी एकवर्ष पछि भेला हुने अवस्था किन र कसरी उत्पन्न भयो होला भन्ने जिज्ञाशा हुनसक्छ। यसको जवाफ सभापति र पदाधिकारी साथीहरुबाट आउने नै छ भन्ने विश्वास गरौँ।