सहजै उलब्ध हुने र खान पनि झमेला नहुने खाना ‘जंकफुड’ हो । यही खानाले शरीरलाई कति असहज बनाउँछ भन्ने बिषयप्रति खासै हेक्का हुँदैन । यस्ता खानाले  शरीरलाई  रोगको घर बनाउँछ । ‘प्याकेट’का खाना स्वास्थ्यका लागि ठिक होइन । 

‘जंकफुड’ भन्नाले खानका लागि उपयुक्त नभएको, अस्वस्थकर र पोषणविहीन खानेकुरा भनि बुझ्नुपर्छ । मानव स्वास्थ्यको लागि आवश्यक पोषण ‘जंकफुड’मा पाइँदैन । यस्ता खाद्यपदार्थमा चिल्लो, गुलियो, अमिलो जस्ता कृतिम स्वाद दिने ‘केमिकल’ प्रयोग हुन्छ । जुन स्वास्थ्यको लागि हानिकारक हुन्छ ।

गेडागुडी, दाल, हरिया सागपात, दूध, दही जस्ता खाद्यपदार्थमा पाइने प्रोटिन, फ्याट, भिटामिन, मिनिरल ‘जंकफुड’बाट पाइँदैन । जुन मानव स्वास्थ्यको लागि ज्यादै महत्वपूर्ण छ । 

‘प्याकेट’को खानामा ‘केमिकल’ प्रयोग गरिएको हुन्छ । त्यसो हुँदा यो लामो समयसम्म सड्दैन । त्यस्ता केमिकल शरीरको लागि हानिकारक हुन्छ । यस्ता खाने खाद्यपदार्थ खाँदा क्यान्सर, हाईपर टेन्सन जस्ता खतरनाक रोग लाग्न सक्छ । ‘जंकफुड’ मध्ये पनि विशेष गरी चाउचाउको प्रयोग धेरै मात्रामा भईरहेको छ । जस्ले मानव शरीरलाई रोगको घरमा परिणत गरिरहेको छ । 

सा–साना बालबालिकालाई सन्तुलित भोजनको आवश्यकता पर्छ । प्रोटिन, कार्बोहाइडे«ट, फ्याट, भिटामिन, मिनिरल्स जस्ता पोषण घरमा बनाइएका खानामा हुन्छ । तर, बजारमा उपलब्ध चाउचाउ, बिस्कुट, कुरकुरे आदिमा यी तत्व हुँदैन । यस्ता खाद्यपदार्थमा केही मात्रामा पिठो राखिएका हुन्छन् । बढी मात्रामा ‘केमिकल’ नै हुन्छन् । यस्ता खाद्यपदार्थले शरीरलाई असर गर्छ । त्यसो हुँदा हामीले आफै पैसा तिरेर विभिन्न रोग खरिद गरिरहेका छौं ।  

‘जंकफुड’ले मुख र दाँतमा समेत असर गर्छ । ‘जंकफुड’मा भएको ‘केमिकल’ले दातलाई पहेँलो बनाउँछ । र, साथै ‘भिटामिन’को कमिले मुखमा घाउँ खटिरा आउने गर्छ । 

‘जंकफुड’विरुद्धको अभियान घरबाटै 
सरकारले सामुदायिक विद्यालयमा उपलब्ध गराउँदै आएको दिवा खाजाबाट ‘जंकफुड’ हटाएको छ । तर, अझै पनि धेरै बालबालिकाले झोला र गोजीमा चाउचाउ र कुरकुरे बोक्न छाडेका छैनन् । धेरै नेपालीको घरमा अझै पनि चाउचाउ नै बढी पाक्ने गर्छ । यही कारण ‘जंकफुड’ विरुद्धको अभियान घर भित्रैबाट सुरु गरिनुपर्छ ।  

शरीरलाई स्वस्थ्य राख्न नेपाली भान्साका परम्परागत परिकार दालभात, रोटी, आलु, सागसब्जी तथा हरिया, फाइबरयुक्त खाद्यपदार्थमा नै जोड दिनुपर्छ । जसले  बालबालिकालाई पनि ‘जंकफुड’बाट टाढा राख्न सहयोग पुगोस् । 
‘जंकफुड’का असरहरु
–पढाईमा ध्यान दिन नसक्ने 
–शारिरीक वृद्धि विकासमा असर गर्ने 
–बुद्धिको विकासमा कमि आउँने 
–सोच्ने क्षमता कम हुने  
–बढी मात्रामा रिस उठ्ने  
–एकै ठाउँमा लामो समय सम्म बसिरहन नसक्ने