इस्लामावाद — पाकिस्तान र इरानबीच भएको उच्चस्तरीय वार्तामा ‘इस्लामावाद एमओयु’ पुनःस्थापना गर्ने दिशामा महत्त्वपूर्ण प्रगति भएको पाकिस्तानी गृहमन्त्री मोहसिन नकवीले बताएका छन्।

इरानको एकदिने भ्रमणका क्रममा गृहमन्त्री नकवीले पाकिस्तानी सेनाप्रमुख असीम मुनीरसहित इरानी राष्ट्रपति मसुद पेजेस्कियानसँग भेटवार्ता गरेका थिए। भेटका क्रममा इरान–अमेरिका द्वन्द्व, मध्यपूर्वमा बढ्दो तनाव तथा क्षेत्रीय तनाव समाधानका सम्भावित उपायबारे छलफल भएको नकवीले जानकारी दिएका छन्।

वार्तामा ‘इस्लामावाद एमओयु’ पुनःस्थापनाका लागि दुवै पक्षले चाल्नुपर्ने आवश्यक कदमलाई प्राथमिकताका साथ छलफल गरिएको उनले बताए। एमओयु पुनःस्थापना भएपछि सम्बन्धित विषयमा देखिएका विवादको समग्र समाधान खोज्न सहज हुने उनको भनाइ छ।

नकवीले वार्तामा पाकिस्तान र इरानबीच रचनात्मक विचार आदानप्रदान भएको बताउँदै पछिल्लो संवादले दुई देशबीचको द्विपक्षीय सहकार्यलाई थप सुदृढ बनाउने विश्वास व्यक्त गरेका छन्।

उनका अनुसार वार्ताबाट सिर्जित सकारात्मक वातावरणले क्षेत्रीय तनाव कम गर्न तथा मध्यपूर्वमा शान्ति र स्थायित्व कायम गर्ने प्रयासलाई थप बल पुग्ने अपेक्षा गरिएको छ।