काठमाडौं । मधेश प्रदेशको मुख्यमन्त्रीमा दावी पेश गर्न शुक्रबार बिहान जनमत पार्टीका सतिश कुमार सिंह प्रदेश प्रमुख कार्यालयमा पुग्नुभएको छ ।

नेकपा एमाले, नेकपा माओवादी केन्द्र र नेकपा एकीकृत समाजवादी पार्टीको समर्थनमा जनमतका सिंहले दावी पेश गर्न लाग्नुभएको हो । सिंहसँगै एमालेका संसदीय दलका नेता सरोज यादव, माओवादी केन्द्रका संसदीय दलका भरत साह, जनमत पार्टीका संसदीय दलका नेता महेश यादव र एकीकृत समाजवादीका संसदीय दलका नेता गोविन्द बहादुर न्यौपाने समेत प्रदेश प्रमुख कार्यालय पुगेका छन् ।

यसअघि जनमत संसदीय दलका नेता महेशप्रसाद यादवको नेतृत्वमा सरकार बनाउने चर्चा भएपनि जनमतले सिंहलाई अगाडि सारेको हो । मधेशमा जनमत पार्टीको १३, एमालेका २४, माओवादी केन्द्रका ९, एकीकृत समाजवादीका ७ र नागरिक उन्मुक्ति पार्टीका १ जना सांसद गरी कुल ५४ सांसदको समर्थनमा जनमतका सिंहलाई मुख्यमन्त्री बनाउन दावी पेश गर्ने तयारी भएको छ ।

जनता समाजवादी पार्टी (जसपा) नेपाल नेतृत्वका मुख्यमन्त्री सरोजकुमार यादवले बुधबार प्रदेश सभाबाट विश्वासको मत नपाएपछि प्रदेश प्रमुख सुमित्रा सुवेदी भण्डारीले बुधबार नै नयाँ सरकार गठनका लागि दलहरूलाई दावी पेस गर्न आह्वान गर्नुभएको थियो ।

प्रदेश प्रमुख भण्डारीले संविधानको धारा १६८ को उपधारा २ बमोजिम मुख्यमन्त्रीमा दावी पेश गर्न शुक्रबार बिहान १० बजेसम्मको समय दिनुभएको हो ।