काठमाडौं । प्रधानमन्त्री पुष्पकमल दाहाल ‘प्रचण्ड’ ले समयको माग र प्रविधिको विकास अनुसार गोरखापत्रले आफूलाई रूपान्तरण गर्न जरुरी भएको बताएका छन् । 
आईतबार काठमाडौंमा आयोजित गोरखापत्र प्रकाशन थालनीको १२३ औँ वर्ष प्रवेशका कार्यक्रममा प्रधानमन्त्री दाहालले अहिलेको प्रतिष्पर्धात्मक बजारमा गोरखापत्रले आफ्नो परम्परागत ढाँचा तथा ढर्रा परिवर्तन गरेर नयाँ ढंगले अघि बढ्नुपर्ने बताए । 
उनले भने ‘‘राज्यप्रतिको जिम्मेवारीमा सचेत रहँदै सबै नेपालीले स्वामित्व लिने सामग्री पस्किनुपर्दछ । अब सूचनाका लागि मात्र पत्रिका कुर्ने अवस्था नरहेकाले सामग्रीको गुणस्तर र विविधतामा विशेष ध्यान दिनु जरूरी छ । गोरखापत्र संस्थान र गोरखापत्रको नेतृत्व सुशासन र समृद्धिको लक्ष्यप्रति जवाफदेही र इमानदार रहेर मात्र आमसञ्चार जगतमा सरकार र सरकारी सञ्चारमाध्यमप्रतिको विश्वसनीयता कायम राख्न र अभिवृद्धि गर्न सकिन्छ ।’
राज्यका सबै कामकारबाही पारदर्शी हुनुपर्नेमा जोड दिँदै उनले राज्यका निकायले गर्ने कार्य सम्पादनका बारेमा जनसमक्ष ल्याउने दायित्व आमसञ्चारमाध्यमको नै भएको बताए । 
राज्यका हरेक संरचनाको पहरेदारी गर्ने भएकाले सञ्चारमाध्यमलाई ‘वाच डग’का रूपमा लिने गरिएको र सञ्चारमाध्यमको यस भूमिका आगामी दिनमा अझ सशक्त बन्नसक्नुपर्ने पनि प्रधानमन्त्री दाहालको भनाइ थियो ।