विप्लव नेतृत्वको नेपाल कम्युनिस्ट पार्टीले विचार मिल्ने पार्टीसँग एकता र मुद्दा मिल्नेसँग संयुक्त मोर्चामार्फत कार्यगत एकता गर्ने नीति लिने भएको छ । सो पार्टीले वैज्ञानिक समाजवादी सत्ता स्थापना गर्ने भएको छ । साथै विप्लव नेतृत्वको पार्टीले नेता कार्यकर्ताको वैचारिकीकरण एवम् जन नेतृत्व निर्माणका लागि कम्युनिस्ट कलेज सञ्चालन गर्ने भएको छ । बुधवार भएको पत्रकार सम्मेलनमा पार्टीको नवौँ केन्द्रीय कमिटी बैठकका निर्णय सार्वजनिक गर्दै यस्तो नीति लिने जनाएको हो ।

 साथै पार्टीले आगामी दिनमा राष्ट्रिय स्वाधीनता र जनताका राजनैतिक एवं आर्थिक अधिकार र जनजीविकाका क्षेत्रमा केन्द्रित रहेर सङ्घर्ष गर्ने निर्णय गरेको छ । ‘जन आधारित पार्टी र जन आधारित नेता कार्यकर्ता’ भन्ने नीति पारित गरेर जनताको सुख दुःखमा पुग्ने योजना अगाडि सारेको छ ।