बागमती प्रदेशको भौतिक पूर्वाधार विकास मन्त्रालयले मकवानपुर, चितवन र धादिङमा बसोबास गरिरहेका चेपाङ, बोटे र वनकरिया जातिलाई २५० वटा घर निर्माण गर्ने भएको छ ।

२४ घरधुरी रहेको वनकरिया समुदायका लागि २४ वटै घर निर्माण गरिनेछ भने बोटे जातिका लागि ५० घर र चेपाङ जातिका लागि १ सय ७६ घर निर्माण गरिने भौतिक पूर्वाधार विकास राज्यमन्त्री सन्तबहादुर प्रजाले जानकारी दिए । ‘एउटा घर निर्माणका लागि ४ लाख रुपैयाँ उपलब्ध गराइने छ’, उनले भने– ‘जसका लागि संघीय सरकारको ५ करोड र बागमती प्रदेश सरकारले ५ करोड गरि १० करोड रुपैयाँ बजेट छुट्याइएको छ ।’

सम्बन्धित समुदायको सामाजिक, सांस्कृतिक मूल्य मान्यता सुहाउँदो किसिमको आवासको डिजाइन मन्त्रालयले नै उपलब्ध गराउने उनले बताए । प्रदेश मन्त्रालय अन्तर्गतको शहरी विकास तथा भवन कार्यालयले आवासीय भवन निर्माण गर्नेछन् ।

पहिरो वा सडक निर्माणका कारणले विस्थापित भएका, खरको छानो भएका, ऐलानी जग्गामा घर भएकाहरुलाई प्राथमिकतामा राखेर घर निर्माण गरिने राज्यमन्त्री प्रजाले बताए । जग्गा नभएकालाई जग्गा उपलब्ध गराएर एकीकृत बस्ती निर्माण गरिनेछ भने जग्गा भएका तर आवासको समस्या भएकाहरुलाई सम्बन्धितको जग्गा भएकै ठाउँमा घर निर्माण गरिने उनको भनाइ छ । एकीकृत बस्ती निर्माण गरिएको स्थानका लागि आवश्यक पर्ने पूर्वाधारहरु सडक, बिजुली, खानेपानी, ढल, खुल्ला क्षेत्र लगायतको निर्माण कार्य प्रदेश सरकारलेनै गर्ने उनले बताए ।

आगामी वर्षको कार्यक्रममा गरिव, विपन्न, सिमान्तकृत तथा लोपोन्मुख थप जात–जातिका लागि घर बनाउने कार्यक्रमलाई निरन्तरता दिइने उनले बताए । यसका लागि चेपाङ, वनकरिया, माझी, थामी, मुसहर, बोटे र हायू एकीकृत बस्त ितथा आवास निर्माण सम्बन्धी कार्यविधि २०७९ तयार पारिएको उनले जानकारी दिए । प्रदेश सरकारले निर्माण पछि हस्तान्तरण गरिएको घर १० वर्षसम्म बेच्न पाइने छैन ।

नेपाल सरकारले चेपाङ र बोटे जातिलाई अति सिमान्तकृत र वनकरियालाई लोपोन्मुख जातिका रुपमा सूचीकृत गरेको छ । राष्ट्रिय जनगणना २०६८ अनुसार नेपालमा चेपाङको जनसंख्या ६८ हजार ३ सय ९९, वनकरिया ६९ र बोटे १० हजार ३ सय ९७ छ ।