गाजा — गाजामा सक्रिय प्यालेस्टिनी समूह हमाससहित अन्य सशस्त्र समूहहरूले हतियार बिसाउने योजना समेटिएको एक सम्झौता पत्रमा सहमति जनाएको दाबी गरिएको छ।

अमेरिकी राष्ट्रपति डोनल्ड ट्रम्पले हमास र अन्य सशस्त्र समूहहरूको पूर्ण निःशस्त्रीकरणका लागि ‘बोर्ड अफ पिस’ले सहमति जुटाएको बताएका छन्। उनले यसलाई शान्ति र सुरक्षातर्फको ऐतिहासिक तथा महत्वपूर्ण कदम भएको दाबी गरेका छन्।

अन्तर्राष्ट्रिय समाचार संस्था अलजजिराका अनुसार हमास वार्ता टोलीका सदस्य गाजी हमादले वार्ता कठिन र चुनौतीपूर्ण भए पनि सम्भव भएसम्म उत्कृष्ट ढाँचा तयार पार्ने प्रयास गरिएको बताएका छन्। उनले सम्झौताबारे चाँडै औपचारिक वक्तव्य सार्वजनिक हुने जानकारी दिएका छन्।

हमादले इजरायली सेनाले आफ्ना प्रतिबद्धता पूरा नगरेमा सम्झौताको कुनै पनि हिस्सा कार्यान्वयन नहुने चेतावनी दिएका छन्। उनका अनुसार हतियार बिसाउने प्रक्रिया इजरायली सेनाको गाजाबाट फिर्ता र पुनर्निर्माणमा हुने प्रगतिसँग जोडिएको छ।

इजरायलले भने अहिलेसम्म सम्झौताबारे औपचारिक प्रतिक्रिया दिएको छैन। राष्ट्रपति ट्रम्पले निःशस्त्रीकरण प्रक्रिया अघि बढेपछि इजरायली सेना गाजाबाट फिर्ता हुने बताएका छन्। उनले यसलाई गाजामा नयाँ प्यालेस्टिनी सरकार स्थापनाको दिशामा महत्वपूर्ण कदमका रूपमा व्याख्या गरेका छन्।

‘बोर्ड अफ पिस’ले पनि सम्झौतालाई ऐतिहासिक सफलता भनेको छ। बोर्डको वक्तव्यमा पहिलोपटक हमासले आफ्ना सबै हतियार त्याग्ने कार्यान्वयनयोग्य योजनामा औपचारिक प्रतिबद्धता जनाएको उल्लेख गरिएको छ।

योजनाअनुसार गाजामा रहेका साना सशस्त्र समूहलाई पहिलो चरणमै निःशस्त्रीकरण गरिनेछ। त्यसपछि हमासले सुरुङ, हतियार भण्डार र उत्पादन केन्द्रलगायत सैन्य पूर्वाधार क्रमशः हटाउने योजना रहेको बताइएको छ। अधिकारीहरूले यो प्रक्रिया लामो समय लाग्न सक्ने बताएका छन्।