अमेरिकी राष्ट्रपति Donald Trump ले इरानसँग अझै पनि करिब २१ देखि २२ प्रतिशत क्षेप्यास्त्र क्षमता बाँकी रहेको दाबी गरेका छन्। शुक्रबार एनबीसी न्यूजको ‘मिट द प्रेस’ कार्यक्रममा अन्तर्वार्ता दिँदै ट्रम्पले अमेरिकाले इरानको सैन्य क्षमतालाई ठूलो मात्रामा कमजोर बनाएको बताएका हुन्।

उनले तेहरानसँग अब आफ्नो पुरानो मिसाइल क्षमताको २१–२२ प्रतिशत मात्र बाँकी रहेको उल्लेख गरे। यसअघि मे महिनामा ट्रम्पले इरानसँग १८ प्रतिशत क्षेप्यास्त्र क्षमता मात्र बाँकी रहेको बताएका थिए।

ट्रम्पले अमेरिकाले इरानको युद्ध क्षमता पूर्ण रूपमा ध्वस्त पारेको दाबी दोहोर्याएका छन्। तर, इरानले भने शुक्रबार ओमानको खाडी क्षेत्रमा रहेका दुई अमेरिकी युद्धपोततर्फ चेतावनीस्वरूप क्षेप्यास्त्र प्रहार गरेको जनाएको छ। यसअघि कुवेतले पनि इरानबाट प्रहार गरिएका ३० वटा ब्यालेस्टिक क्षेप्यास्त्र निष्क्रिय पारिएको जानकारी दिएको थियो।

पछिल्ला केही सातादेखि जारी तनावपूर्ण वार्ता र चेतावनीका श्रृंखलाबीच दुवै देश युद्ध अन्त्य गर्ने सहमतिमा पुग्न सकेका छैनन्। यद्यपि ट्रम्पले इरानसँग सम्झौता गर्नुको विकल्प नरहेको बताएका छन्।

उनले इरान अझै पनि केही हदसम्म सैन्य रूपमा सक्षम रहेको र आफूहरू अपेक्षाभन्दा बढी हतियार भण्डार बाँकी रहेको दाबी गरे।

तर ट्रम्पको भनाइ अमेरिकी गुप्तचर निकायको मूल्याङ्कनसँग मेल खाँदैन। अमेरिकी सञ्चारमाध्यम The New York Times को प्रतिवेदनअनुसार गत महिना सांसदहरूलाई दिइएको गोप्य जानकारीमा इरानले ‘स्ट्रेट अफ हर्मुज’ नजिक रहेका अधिकांश क्षेप्यास्त्र नियन्त्रण केन्द्र पुनः सञ्चालनमा ल्याइसकेको उल्लेख गरिएको थियो।

उक्त प्रतिवेदनमा इरानसँग युद्धअघि रहेको क्षेप्यास्त्र भण्डारको करिब ७० प्रतिशत हिस्सा अझै सुरक्षित रहेको दाबी गरिएको छ।