इरानले सामरिक रूपमा निकै महत्त्वपूर्ण मानिने ‘स्ट्रेट अफ हर्मुज’ व्यापारिक जहाजका लागि पुनः बन्द गर्ने घोषणा गरेको छ । शनिबार जलसन्धि क्षेत्रमा केही जहाजमाथि आक्रमण भएको खबर सार्वजनिक भएसँगै इरानले सो क्षेत्रमा प्रवेश गर्ने जुनसुकै जहाजलाई निशाना बनाइने चेतावनी दिएको हो ।

इरानको ‘इस्लामिक रिभोल्युसनरी गार्ड कर्प्स’ (आईजीआरसी) ले अमेरिकाले जारी राखेको नाकाबन्दीका कारण यो निर्णय लिनु परेको जनाएको छ । इरानी विदेशमन्त्रीले जलसन्धि अस्थायी रूपमा खुला गरिएको घोषणा गरेको भोलिपल्टै सेनाले पुनः बन्दको निर्णय लिएको हो ।

इरानी नौसेनाले एक विज्ञप्ति जारी गर्दै फारसको खाडी वा ओमानको सागरमा रहेका कुनै पनि जहाजलाई आफ्नो स्थानबाट अघि नबढ्न चेतावनी दिएको छ । “हर्मुज जलसन्धि तर्फ आउनुलाई शत्रुलाई सहयोग गरेको मानिनेछ र त्यस्ता जहाजलाई लक्षित गरी आक्रमण गरिनेछ,” आईजीआरसीको भनाइ उद्धृत गर्दै बिबिसीले लेखेको छ ।

यता अमेरिकी राष्ट्रपति डोनाल्ड ट्रम्पले इरानको यो धम्कीबाट अमेरिका नडराउने प्रतिक्रिया दिएका छन् । ट्रम्पले इरानले ‘ब्ल्याकमेल’ गर्न खोजेको आरोप लगाउँदै जलमार्ग बन्द गरेर विश्वव्यापी ऊर्जा संकट सिर्जना गरेको बताएका छन् । इरानले विगत दुई महिनादेखि यो मार्गलाई प्रभावकारी रूपमा अवरुद्ध पार्दा अन्तर्राष्ट्रिय बजारमा इन्धनको मूल्य आकाशिएको छ ।

अमेरिकाले इरानी बन्दरगाहमा गरेको नौसैनिक नाकाबन्दी दुई देशबीच शान्ति सम्झौता नभएसम्म जारी रहने अडान लिएको छ । हाल कायम रहेको दुई हप्ते युद्धविराम अप्रिल २२ मा समाप्त हुँदैछ ।