महोत्सव उद्घाटन गर्न हेलिकप्टर चढेर धादिङ पुगे उपप्रधानमन्त्री सिंह
काठमाडौं- अहिले देशभर मेला र महोत्सवको माहोल छ । देशका विभिन्न ठाउँमा महोत्सव चलिरहँदा कलाकार, नेता र मन्त्रीसमेतले घुमघाम गर्न पाइरहेका छन् ।
महोत्सवले संघीय सरकारका मन्त्रीहरूलाई समेत छोएको छैन । काठमाडौंबाट जहाज र हेलिकप्टर चढेर मन्त्रीहरू देशका विभिन्न जिल्लाका महोत्सवमा अतिथि-प्रमुख अतिथि भइरहेका छन् ।
स्थानीय तहहरूलाई बजेट सक्ने गतिलो माध्यम मेला र महोत्सव भइरहेका छन् । जिल्लामा हुने कृषि महोत्वसमा लाखौँ खर्चिएर राष्ट्रिय कलाकार लगिन्छ । नेता मन्त्रीलाई पनि उस्तै खर्च गरेर स्थानीय तहले लगिरहेका छन् ।
नेपाली कांग्रेस र नेकपा एमाले मिलेर बनेको बलियो सरकारले नतिजा दिन नसकिरहेको गुनासो आइरहेका बेला मन्त्रीहरूलाई महोत्सवले व्यस्त बनाइरहेको छ ।
महोत्वसको माहोलले उपप्रधान तथा शहरी विकास मन्त्री प्रकाशमान सिंहलाई पनि नछुने कुरै भएन । औपचारिक कार्यक्रम, मेला-महोत्सव उद्घाटनमा अभिरुचि राख्ने नेतामा पर्छन् प्रकाशमान ।
उनी बिहीबार काठमाडौंसँगै जोडिएको धादिङ सदरमुकाम धादिङ बेंसीमा सुरु हुने लोक सांस्कृतिक महोत्सव उद्घाटनका लागि त्यसतर्फ गएका छन् ।
अनौठो त के भने काठमाडौंसँगै सिमाना जोडिएको जिल्लामा जान पनि प्रकाशमानका लागि हेलिकप्टर आवश्यक पर्यो । संघीय राजधानी जोड्ने त्रिभुवन राजपथ र पृथ्वी राजमार्ग छिचोल्दै धादिङ बेंसी करिब साढे ३ घण्टामा पुग्न सकिन्छ ।
मेचीदेखि महाकालीसम्मका हजारौँ सर्वसाधारण यही बाटो हुँदै संघीय राजधानी ओहोरदोहोर गरिरहन्छन् । तर मन्त्रीलाई भने काठमाडौंबाट ८८.३ किलोमिटर परको धादिङ बेंसी पुग्न हेलिकप्टर नै चार्टर्ड गर्नुपर्यो ।
काठमाडौंसँगै सीमा जोडिएको भए पनि धादिङ पुगेर फर्किँदा हेलिकप्टरलाई कम्तीमा पनि ३ लाख बुझाउनुपर्ने हुन्छ । जबकि गाडीमै जाँदा पनि बिहान पुगेर बेलुका फर्किने दूरीमा छ धादिङ बेंसी । धादिङ बेंसीको सडक दूरी ८८.३ किलोमिटर हुँदा सीधा हवाई दूरी विमानस्थलबाट ४७.८० मात्रै छ ।
संघीय राजधानीसँग सीमा जोडिएको जिल्ला तलबाट जाँदा उपप्रधानमन्त्री सिंहलाई राजमार्गमा जामको डर, असुरक्षा र जनआक्रोशको शिकार हुने डर पनि पसेको हुन सक्छ । केही दिनअघि मात्रै झापामा कोशी प्रदेशका पूर्वमुख्यमन्त्री उद्धव थापाले मुक्का खाएको घटना सेलाइसकेको छैन ।
धादिङबेंसीमा बिहीबारदेखि देखि माघ २० गतेसम्म ‘लोक संस्कृतिको प्रर्वद्धनको सारः पहिचान पर्यटन र समृद्धिको आधार’ भन्ने नारासाथ ‘धादिङ लोक सांस्कृतिक महोत्सव २०८१’ हुँदैछ । त्यही महोत्सवको उद्घाटनका लागि सिंह केही सहयोगीसहित हेलिकप्टर चढेर त्यहाँ पुगिसकेका छन् ।
बिहिबार बिहान १० बजेदेखि धादिङबेंसी पुछारबजारबाट बहुसांस्कृतिक भाषा भाषीको प्रतियोगितात्मक झाँकीसहितको र्याली गरिएको छ। मध्यान्ह १२ बजे धादिङबेंसीस्थित खुलामञ्चमा ‘धादिङ लोक सांस्कृतिक महोत्सव २०८१’ विधिवत उद्घाटन सिंहले गरेका छन् ।
प्रतियोगितामा धादिङका सबै स्थाननीय तहका ११ टिम र अन्य दुई गरी १४ टिमको सहभागिता छ । राष्ट्रिय तथा स्थानीय कलाकारहरूबाट दैनिक प्रस्तुति रहने राष्ट्रिय लोक तथा दोहोरी गीत प्रतिष्ठान धादिङका उपाध्यक्ष संगीत सुवेदीलले बताएका छन् ।
