काठमाडौं । विश्वको तापमान असमान्य ढंगले वृद्धि भइरहेको अवस्थामा विश्वभर पृथ्बीको वातावरणलाई लिएर बहस सुरु भएको धेरै बर्ष वितिसक्यो । 
यही सन्द्धर्भमा हरेक बर्ष जुन ५ का दिन मनाईने विश्व वातावरण दिवसको महत्व झनै चुलिएको छ । यस बर्षका लागि प्लाष्टिक प्रदूषणविरुद्ध लागौं भन्ने नाराका साथ यो दिवस मनाइदैछ । 
सन् १९७२ को जुन १८ मा संयुक्त राष्ट्र संघले विश्व वातावरण सम्मेलनको आयोजना गरी वातावरण संरक्षणका हेतु विश्वभर जनचेतना जगाउन वातावरण दिवसको आवश्यकता बोध गरेको थियो । सोही सम्मेलनको अर्को बर्ष अर्थात सन् १९७३ को जुन ५ का दिन पहिलो पटक विश्व वातावरण दिवसको रुपमा १९७२ को जुन १८ को प्रयासलाई सार्थकता दिने प्रयास गरियो । यही दिवसको उपलब्धि स्वरुप हरेक बर्ष जुन ५ मा वातावरण दिवस मनाउन थालियो ।
नेपालमा पनि यो दिवस हरेक बर्ष भव्यताका साथ मनाइदै आएको छ । 
नेपालको संविधान २०७२ को धारा ३० मा प्रत्येक नागरिकलाई स्वच्छ वातावरणको मौलिक हकको प्रत्याभूत गरिएको छ । तर नेपालमा वातावरण विनाशको घटना बढ्दै गर्दा स्वच्छ वातावरणमा विचरण गर्न पाउने अधिकार कुण्ठित हुँदै आएको छ ।