सन ह्युङमिन चौथो विश्वकपका लागि तयार, कोरियाको मुख्य आशा बने
एजेन्सी — एसियाका उत्कृष्ट फुटबलरमध्येका एक सन ह्युङमिन आफ्नो उपलब्धिका कारण पहिले नै आफ्नो विरासत स्थापित गरिसकेका छन्।
पूर्व इंग्लिस क्लब टोटनहम हट्सपर का कप्तानसमेत रहेका सन अहिले अमेरिकाको लस एन्जलस एफसी बाट खेलिरहेका छन्। उनी आफ्नो चौथो फिफा विश्वकप खेल्ने तयारीमा छन्।
सन दक्षिण कोरियाका प्रमुख खेलाडीका रूपमा अझै पनि केन्द्रमा छन् र विश्व मञ्चमा फेरि प्रभावशाली प्रदर्शन गर्ने लक्ष्यमा छन्।
उनी विश्वका शीर्ष फरवार्डमध्ये एक मानिन्छन्। तीव्र गति, गोल गर्ने क्षमता र उत्कृष्ट पासका कारण उनी विश्व फुटबलमा अलग पहिचान बनाएका खेलाडी हुन्।
सन् २०१५ देखि २०२५ सम्म प्रिमियर लिगमा उनले लगातार उत्कृष्ट प्रदर्शन गर्दै धेरै सिजन दोहोरो अंकमा असिस्ट पनि दिएका थिए।
१८ वर्षमै जर्मनीको बन्डेसलिगामा डेब्यू गरेका सनले ह्याम्बर्ग र बायर लेभरकुजनबाट ४९ गोल गरेका थिए। त्यसपछि २०१५ मा टोटनहममा प्रवेश गरेपछि उनी क्लबका प्रमुख स्टार बने।
२०१८/१९ सिजनमा बर्नलीविरुद्ध सात खेलाडी छलेर गरेको एकल गोलले उनलाई फिफा पुस्कास अवार्ड र ‘सिजनको उत्कृष्ट गोल’ दुवै दिलाएको थियो।
टोटनहमका लागि उनले ४५४ खेलमा १७३ गोल गरे। कप्तानका रूपमा उनले क्लबलाई युईएफए युरोपा लिग उपाधिसमेत जिताएका थिए।
सन दक्षिण कोरियाका लागि सबैभन्दा धेरै खेल खेल्ने खेलाडी हुन्। उनले १४० भन्दा बढी खेलमा ५४ गोल गरेका छन् र राष्ट्रिय गोल रेकर्ड नजिक छन्।
विश्वकपमा उनले हालसम्म ३ गोल गरेका छन्। २०२६ मा थप गोल गर्दै उनी एसियाली खेलाडीमध्ये सर्वाधिक विश्वकप गोलकर्ताको रेकर्ड बनाउन चाहन्छन्।
सन् २०१४, २०१८ र २०२२ का विश्वकपमा उनले महत्वपूर्ण प्रदर्शन गरेका थिए। २०२२ मा चोटका बाबजुद मास्क लगाएर खेलेका सनले कोरियालाई नकआउट चरण नजिक पुर्याएका थिए।
कोरियाली प्रशिक्षक होङ म्युङ–बोको नेतृत्वमा रहेको टोलीमा ली काङ–इन, किम मिन–जे, ह्वाङ ही–चानलगायत युवा प्रतिभाशाली खेलाडीहरू छन्।
सनको नेतृत्वमा दक्षिण कोरियाले २०२६ फिफा विश्वकपमा बलियो प्रदर्शन गर्ने लक्ष्य राखेको छ।
