काठमाडौँ/पोखरा — ‘हिमालले उमेर सोध्दैन, केवल साहस र दृढ इच्छाशक्ति खोज्छ’ भन्ने भनाइलाई चरितार्थ गर्दै भारतका सात वर्षीय बालक तेगबीर सिंहले नेपालको अन्नपूर्ण पदमार्गअन्तर्गत रहेको ५,४१६ मिटर उचाइको थोरङ्ला पास सफलतापूर्वक पार गरी विश्वकै कान्छो पदयात्रीको कीर्तिमान कायम गरेका छन्।

पञ्जाबको रोपड निवासी तेगबीरले ७ वर्ष ६ महिनाको उमेरमा यो उपलब्धि हासिल गरेका हुन्। यसअघि यो कीर्तिमान दुबईका इभान क्रुस्कोभको नाममा थियो, जसले ७ वर्ष १० महिनामा थोरङ्ला पास पार गरेका थिए।

अप्रिल ११ मा बुबासँग सुरु भएको यात्रा करिब २३० किलोमिटर लामो अन्नपूर्ण सर्किट हुँदै अप्रिल १८ को बिहान ९:२५ बजे थोरङ्ला पासमा पुगेपछि सफलतापूर्वक सम्पन्न भएको हो। यात्राका क्रममा माइनस १३ डिग्री सेल्सियससम्मको कठ्याङ्ग्रिने चिसो, उच्च उचाइको अक्सिजन कमी र कठिन भौगोलिक अवस्थालाई पार गर्नु परेको थियो।

गाइड दलबहादुर गुरुङका अनुसार बालक तेगबीर यात्राभर उत्साहित, जिज्ञासु र अत्यन्तै सक्रिय देखिन्थे। “उनले कहिल्यै थकान देखाएनन्, निरन्तर हिँडिरहे,” गुरुङले बताए।

भरिया यम गुरुङले पनि तेगबीरको सकारात्मक ऊर्जा र रमाइलो स्वभावले यात्रालाई सहज बनाएको उल्लेख गरे।

तेगबीरका बुबा सुखिन्दरदिप सिंहका अनुसार छोराको सफलताको आधार नियमित व्यायाम, अनुशासन र सन्तुलित आहार हो। उनले भने, “हामीले कहिल्यै रेकर्डका लागि दबाब दिएनौँ, उसको रुचि र आत्मविश्वास नै सफलताको आधार हो।”

यसअघि नै तेगबीरले अफ्रिकाको किलिमन्जारो, युरोपको माउन्ट एल्ब्रस तथा सन् २०२४ मा पाँच वर्षको उमेरमै ५,३६४ मिटर उचाइको एभरेष्ट बेस क्याम्पसमेत पुगेका थिए।

सन् २०१८ सेप्टेम्बर २४ मा जन्मिएका तेगबीर हाल कक्षा ३ मा अध्ययनरत छन्। उनको उपलब्धिलाई नेपालको साहसिक पर्यटन क्षेत्रका सरोकारवालाले पनि प्रशंसनीय बताएका छन्।

ट्रेकिङ एजेन्सिज एसोसिएसन अफ नेपाल (टान) गण्डकीका अध्यक्ष कृष्ण आचार्यले यसले नेपालको पदमार्ग सुरक्षित र विश्वस्तरीय रहेको सन्देश दिएको बताए। त्यस्तै, नेपाल पर्यटन बोर्ड गण्डकीका प्रमुख मणिराज लामिछानेले यो उपलब्धिले नेपालको पर्यटन पहिचानलाई थप मजबुत बनाएको प्रतिक्रिया दिएका छन्।

तेगबीरका बुबाले भने नेपालमा १६ वर्षमुनिका बालबालिकालाई पर्वतारोहण अनुमति नदिने नीतिबारे पुनर्विचार गर्नुपर्ने सुझावसमेत दिएका छन्।

तेगबीर सिंहको यो उपलब्धि बालसाहस, पारिवारिक समर्थन र उच्च आत्मविश्वासको उदाहरण बनेको छ, जसले विश्व पर्वतारोहण समुदायमा नयाँ चर्चा सिर्जना गरेको छ।