पाकिस्तानमा सम्पन्न ‘ब्याडमिन्टन एसिया-साउथ एसिया रिजनल च्याम्पियनसिप २०२६’को नतिजा नेपालको पक्षमा देखिएको छ ।

नेपाली खेलाडी प्रिन्स दाहालले दोहोरो स्वर्ण पदक हात पारे । पुरुष एकलतर्फको प्रतिस्पर्धामा आयोजक राष्ट्र पाकिस्तानलाई पराजित गर्दै उनले स्वर्ण पदक उचालेका हुन् ।

दाहालले २१–९, १२–२१ र २१–६ को सेटमा जित निकालेका हुन् । त्यस्तै, दाहालले मिक्स डबल्समा रसिला महर्जनसँग जोडी बनाउँदै नेपालका लागि अर्को स्वर्ण पदक थपे । नेपाली खेलाडीहरूले स्वर्णका साथै रजत र काँस्य पदक पनि उपस्थिति बनाए ।

पुरुष डबल्समा प्रिन्स दाहाल र क्षितिज खनालको जोडीले रजत पदक जिते । मिक्स टिम इभेन्टमा पनि नेपालले रजत पदक हात पार्यो । मिक्स टिममा प्रिन्स, क्षितिज, रसिला र शेस्ना श्रीपाली सामेल थिए ।

महिला एकलतर्फ रसिलाले काँस्य पदक जितिन् । महिला डबल्समा रसिला र शेस्नाको जोडीले अर्को काँस्य पदक हात पर्‍यो ।