४ मंसिर, काठमाडौं । विपद् उद्दारका क्रममा ज्यान गुमाउने सशस्त्र प्रहरीका कर्मचारी अब एक तह बढुवासहित पारिवारिक निवृत्तिभरण (पेन्सन) पाउने भएका छन्। मंगलबार बसेको मन्त्रिपरिषद्को बैठकले सशस्त्र प्रहरी नियमावलीको चौथो संशोधन पारित गर्दै यो व्यवस्था लागू गरेको हो।

नयाँ व्यवस्थाअनुसार विपद्मा खटिएको अवस्थामा ज्यान गुमाउने सशस्त्र प्रहरीलाई मरणोपरान्त एक तह बढुवा दिइनेछ। साथै उनको परिवारलाई पारिवारिक पेन्सन उपलब्ध गराइनेछ।

यसअघि नियमावलीको नियम ७६ को उपनियम २ मा केवल मुठभेड, आक्रमण, बिस्फोट, हतियारधारी समूह वा त्यस्तै अन्य समूहविरुद्धको कारबाहीका क्रममा मृत्यु भएमा मात्र बढुवा र पेन्सन सुविधाको व्यवस्था थियो। अब यो प्रावधानलाई विस्तार गर्दै विपद् व्यवस्थापन तथा उद्दारताका क्रममा मृत्यु भएका कर्मचारी पनि उक्त सुविधामा समावेश हुने भएका छन्।

नियमावली संशोधनसँगै सशस्त्र प्रहरीका जोखिमपूर्ण जिम्मेवारीमा खटिने कर्मचारी तथा उनका परिवारलाई थप सुरक्षाको भावना मिल्ने अपेक्षा गरिएको छ।