काठमाडौं । गृहमन्त्री ओमप्रकाश अर्यालले निवर्तमान ऊर्जामन्त्री भागिसकेको र अन्य केही नेताहरू पनि भाग्न खोजिरहेको दाबी गरेका छन्। आइतबारको द्धष्ट्रि संचार दैनिकमा प्रकाशित एक अन्तर्वार्तामा मन्त्री अर्यालले ठूला नेताहरूको सम्पत्ति छानबिन सुरु भएसँगै यस्तो अवस्था देखिएको बताएका हुन्।

अर्यालले स्पष्ट रूपमा नाम नलिए पनि भदौ २३ र २४ को जेनजी आन्दोलनका बेला ऊर्जामन्त्री रहेका कांग्रेस नेता दीपक खड्का प्रति संकेत गरेका छन्। त्यही आन्दोलनका क्रममा खड्काको बूढानीलकण्ठस्थित घरमा आगजनी भएको थियो।

> “तत्कालीन ऊर्जामन्त्री भागिसके। अरू पनि भाग्न खोज्दै छन्,” मन्त्री अर्यालको भनाइ छ। “अहिले हामी सम्पत्ति शुद्धीकरण अनुसन्धान विभागलाई सक्रिय बनाइरहेका छौं। ठूला नेताहरूको छानबिन सुरु भइसकेको छ।”

गृहमन्त्री अर्यालले भागाभाग रोक्न कानुनी उपाय खोजिरहेको जानकारी दिएका छन्। प्रारम्भिक अनुसन्धानमा कुनै कठिनाइ नरहेको भन्दै उनले सम्पत्ति विवरणको विस्तृत अध्ययनपछि आवश्यक व्यक्तिहरूलाई बयानका लागि बोलाइने र मुद्दा दर्ताका क्रममा पक्राउ गरिने बताएका छन्।

अन्तर्वार्तामा गृहमन्त्री अर्यालले एमाले अध्यक्ष तथा पूर्वप्रधानमन्त्री केपी शर्मा ओलीप्रति पनि कडा आक्रोश पोखेका छन्। उनले ओलीको कथित ‘आपराधिक लापरबाही’ (क्रिमिनल नेग्लीजेन्स) ले भदौ २४ को जनविद्रोह चर्किएको आरोप लगाएका छन्।

> “उहाँमा सैतानी प्रवृत्ति छ, खालि भड्काउने मात्र खोज्नुहुन्छ। उहाँ आजसम्म सुध्रनुभएको छैन,” मन्त्री अर्यालले भने।
> “जेन–जी पुस्ताको विद्रोहले नै ओलीलाई हटाएको हो। उहाँले त्यसको बोध गर्नुभएन।”

सरकार चुनाव नगराउने उद्देश्यसहित दमन गरिरहेको आरोपबारे सोधिएको प्रश्नमा मन्त्री अर्यालले त्यसलाई अस्वीकार गर्दै उल्टै ओलीले अवस्था भड्काउने भूमिका खेलेको आरोप लगाए।

जेनजी आन्दोलनपछि बनेको अन्तरिम सरकारले सुशीला कार्कीको नेतृत्वमा चन्द्रप्रकाश गजुरेललाई ऊर्जामन्त्री बनाएको छ। गजुरेलसँगै **कुलमान घिसिङ** पनि सरकारमा फर्किएका छन्, जसलाई खड्काकै पहलमा अघिल्लो कार्यकालमा हटाइएको थियो।