सिन्धुपाल्चोकको ४५ मेगावाट क्षमताको माथिल्लो भोटेकोशी जलविद्युत आयोजना ‘फ्रि’ सेयर मागका कारण एक महिना दुई दिनसम्म बन्द हुँदा करिब ३२ करोड रुपैयाँ घाटा भएको छ। भोटेकोशी पावर कम्पनी प्रालिका प्रमुख कार्यकारी अधिकृत बिक्रम रत्न स्थापितले भदौ २४ देखि आयोजना बन्द भएको र दैनिक एक करोड रुपैयाँ घाटा भैरहेको बताए।

स्थानीय राजनीतिक दलहरूको दबाबमा २०७१ पुसमा आयोजना प्रभावितलाई ६ प्रतिशत सेयर दिने सम्झौता भएको थियो भने अहिले ४ प्रतिशत थप गरी कुल १० प्रतिशत सेयर दिने नयाँ सम्झौता भइसकेको छ। आइतबार माथिल्लो भोटेकोशी जलविद्युत आयोजनाले भोटेकोशी जेन–जी पब्लिक इन्भेष्टमेन्ट प्रालिसँग १० प्रतिशत सेयर दिने सहमति गरेको छ।

स्थापितले भने, “मर्मतसम्भारपछि सोमबारदेखि सञ्चालनमा ल्याउने तयारी भइरहेको छ। सेयरसम्बन्धी प्रक्रिया अघि बढिसकेपछि मात्रै स्थायी रूपमा सञ्चालन हुन सक्नेछ।”